Shillong, Nailar 21
U heh pulit barim ka Jylla uba long ruh u Rangbah Shnong bathymmai ka Riatsamthiah, Bah Mariahom Kharkrang u la ban jur ba ka lynti ban tehlakam ïa ka jingkynrei u drok ka dei ban sdang shuwa na ki ïing ki sem.
“Lada ngi kwah ban tehlakam ïa u drok, nyngkong eh ngi hap ban sdang na la ïing iwei-pa-iwei, nangto kan sa poi sha ka shnong bad kumta ter-ter,” la ong u Bah Kharkrang.
U la ïathuh ba haba phai sha Riatsamthiah, na ka liang ka shnong ka la pyrshang ban khot ban wer ïa ki longkmie-longkpa bad kan pynlong ruh ïa ka prokram ai jinghikai sha ki khnang ba kin sngewthuh bad ithuh lada ki khun jong ki, ki la sdang ban ngop ha utei u jingdih pynbuaid.
“Bunsien ki kmie ki kpa, ïalade kim dih bad lada ki khun jong ki, ki sdang ban mad ïa u drok…kim tip, bad ki tip ynda la dier palat bad ha kata ka por ym lah leh eiei shuh ynda la kyrni,” u la ong.
Nalor katei u la ong ba ka shnong kan hap ruh ban peitngor ïa ka ïaid ka ïeng khamtam jong ki kali kiba wan nabar bad kiba pyrshang ban pynrung ïa utei u jingdih pynbuaid hapoh shnong poh thaw.
Shuh shuh u la bynrap, “Nga sngew ba lada man ki shnong ngi ïatrei kam lang, nga tharai ngin lah hi, naba ngim lah ban shaniah tang ha ka Sorkar ne tnad pulit.”
Na ka liang utei u nongïalam shnong u la ai jingmut ba lada ki shnong ki trei ha la i jong i jong i kyntoit, kan ïarap shi kat dei ha ka ban tehlakam ïa u drok bad kum ka Dorbar Shnong Riatsamthiah kan ai ka jingïatreilang ïa ka tnad pulit lada ka donkam khnang ban rat dyngkhong ïa une u jingdih ba sniew.
