Shillong, Nailar 21
Uwei u pulit Home Guard uba ap pahara ïa kawei na ki Power House jong ka Meghalaya Energy Corporation Limited (MeECL) kaba don ha Lumkshaid u la ïohi ïa kawei ka metïap jong uwei u rangbah kaba la per ha sla um ha Sunapani ha ka Lah Sngi U Blei ha ka por kumba 12:15 mynsngi.
Haba ïohi ïa katei ka metïap, utei u pulit Home Guard u la pyntip noh sha ki bor pulit ha kaba shi kynhun ki pulit na thanat Mawlai ki la leit sha katei ka jaka.
Katkum ka khubor ba la ïohlum na ki pulit, la ong ba katei ka met ka dei jong u Bah Shanbor Surong. Ki bahaïing hasem jong u Bah Shanbor ki la synran lang ïa ki pulit ha ka por ba la leit shim ïa ka met.
Lah ban pynkynmaw ba u Bah Shanbor, 38 snem ka rta, u la jah rngai naduh ka 17 tarik Nailar, 2023 ha ka por 2 baje mynstep katba u dang mih na Patarim Mawlai Nongkwar na ka ïingsah ka ñia-kha ban leit phai sha ka ïing sah lajong kaba don ha Jaïaw Pdeng, Shillong.
Ha kine ki khyndiat sngi ba la dep, na ka liang ka kynhun jong ka Search and Rescue Team (SRT) lem ki bahaïing hasem jong u Bah Shanbor ki la pyrshang ban leit wad ïa utei u rangbah sha riat Mawlai Nongkwar hynrei kim shym la lap satia tat haduh mynta ka sngi.
Na ka liang ki bahaïing hasem jong utei u rangbah kiba la wan poi ha Sunapani ki la pynshisha ba katei ka met ka dei jong u Bah Shanbor. Kumta na ka liang ki pulit ki la pynkit noh ïa ka met jong utei u rangbah sha Shillong Civil Hospital ha ka kamra buh metïap khnang ban leh ïa ka Post Mortem ha ka sngi kaba bud hashwa ban aiti sha ki bahaïing hasem ba kin pyndep ïa ka niam ka rukom.
Ka jingtohkit halor kane ka jingjia ka la ïaid shakhmat bad ïa ka jingtohkit la leh da ki pulit ka thanat Lumdiengjri. Kat haduh mynta ym pat tip na kaei ka daw utei u rangbah u la khlad. Kumta na ka liang ki pulit ki la pynrung da ka jingujor halor katei ka jingjia.
