Jowai, Nailar 21
Ka Khasi Students’ Union (KSU), Narpuh Circle ka la pynpaw ïa ka jingbitar hadien ba ka la pynlong ïa ka jingleit jurip ha ka Lah Sngi U Blei ïa ka surok NH-6 naduh Mynkre shaduh Malidor ha kaba ki la shem ba kam shym la don satia kano-kano ka jingmaramot kumba la kular da ka NHAI hakhmat ka seng bad ki nongïalam shnong.
Ha kane ka jingleit jurip ïa katei ka surok la ïalam da u samla S. Lapasam, Organising Secretary, ryngkat ki dkhot jong ka seng. Ha ka jingjurip la shem ba ka NHAI ka la leh bym suidñiew halor ka jingdawa ban maramot ïa katei ka surok kaba la pynlong ruh ïa ki paidbah nongleit nongwan ba kin nang ïakynduh shuh shuh ïa ki jingeh katba nang mih ki sngi.
Ka KSU ka la ong ba na ka liang ka NHAI ka la kular hakhmat ka seng lem bad ki Waheh Shnong ka Elaka Narpuh ha ka sngi ba pynlong ïa ka jingïakhih paidbah ha ka 8 tarik Nailar hakhmat ka Tollgate ha Lumshnong ha kaba ka seng ka la khang khyrdep ruh shipor ïa katei ka jaka lum khajna bad kan plie ïa ka tala tat haduh ba ka NHAI kan pyndep ïa ka jingmaramot haduh 60 ne 70% ïa katei ka surok.
Kumta ka KSU ka la ong ba kane ka jingleh bym suidñiew jong ka NHAI ban pyndep ïa ki jingkular ki jong ka kiba ka la kular hakhmat ki spah ngut ki paidbah ba pynlong ïa ka jingïakhih ka la pynbitar jur ïa ka KSU kumjuh ïa ki paidbah.
Ka KSU ka la ong ruh ba kane ka jingleh ka NHAI ka long kum ka jingpynbor sa shisien ïa ka seng bad ki paidbah kumjuh ïa ki Waheh Shnong ban pynlong biang da ka jingïakhih kaba kham tyngeh.
Shuh shuh ka seng ka la ong ruh ba mynta la dap ar taïew naduh ba la pynlong ïa katei ka jingïakhih hakhmat jong katei ka Tollgate bad ba ïa katei ka jaka lum khajna ruh dang khang khyrdep haduh mynta.
