Shillong, Nailar 21
Hadien ka jingïakhih bad ka jingdawa kaba la neh kumba shibnai ne arbnai tam eiei, ka jingdawa jong Seng Samla Hima Langrin ha ryngkat bad ki khun ki hajar jong ka Hima ban weng noh ïa u Syiem ka Hima Langrin, u Pa’iem Nangtei Syiemïong ka la urlong ha kane ka sien kaba mynta. Kane ka wan urlong hadien ba ka Executive Committee (EC) jong ka Khasi Hills Autonomous District Council (KHADC) ka la pynmih ïa ka jingpynbna paidbah ha ka 18 tarik u bnai Nailar ha kaba ka la pyntip paidbah ba ka la pynhiar khet noh shipor ïa u Pa’iem Nangtei Syiemïong na ka khet jong u.
Ka jingdawa jong ka Seng Samla Hima Langrin ban weng noh mardor ïa u Syiem ka Hima Langrin, u Pa’iem Nangtei Syiemïong ka dei halor ka jingbym shai ki rukom treikam jong u ha ka kheiñ ka diah bad ka jingmih ki artylli ki bor synshar hapoh ka Hima kata ka jingsynshar Syiem bad ka jingsynshar jong ka Management Board.
Ïa ka synshar ka khadar jong ka Hima la pynkhamti shipor ha u Bah B. Syiemïong kum u Acting Syiem jong ka Hima.
Haba kren sha ki lad pathai khubor ha ka Lah Sngi U Blei, u President jong ka Seng Samla Hima Langrin, u Bah PS Lyngdoh, u la ong ba ka Seng Samla ka pynpaw ïa ka jingsngewnguh shikatdei eh ïa ka KHADC kaba la sngap ïa ka jingud jingnam jong ki khun ki hajar ka Hima ban weng noh ïa u Syiem Nangtei Syiemïong na ka shuki Syiem jong u katba ka jingtohkit pyrshah ïa u ka dang ïaid shakhmat.
Na ka liang ka Seng Samla Hima Langrin ka la pynpaw ruh ka jingsngewnguh ïa ki paidbah jong ka Hima kiba la ïasnohkti lang ha ka jingïaleh jong ka Seng Samla Hima Langrin haduh ban da ïoh ïa ka jingjop.
“Ngi shu kwah ban ai khublei ïa ki paidbah nongshong shnong, ki khun ki hajar ka Hima ïa ka jingïashimbynta jong ki haduh ban da ïoh ïa u soh ka jingjop”, la ong u Bah PS Lyngdoh.
Shuh shuh u Bah PS Lyngdoh u la ong ba ka seng samla kam don kano-kano ka jingbishni ïa ka jingsynshar jong utei u Pa’iem Nangtei Syiemïong, hynrei ka daw ka dei ba ha ka 26 tarik jong u bnai Jymmang ha ka por ba ka don ka Dorbar Pyllun jong ka Hima, na ka liang jong utei u Syiem u la pynkheiñ ïa ka synshar ka khadar, ka riti ka dustur bad um don shuh ka burom ïa ki paidbah nongshong shnong jong ka Hima.
“Watla ngi la pyrshang ban ïakren sngewthuh bad ki hynrei kim pdiang ïa ngi khamtam eh ïa ka jingbym shai ha ka liang jong ka jingmih jingsep jong ka Hima bad ruh ïa kata ka jingdon ka bor synshar artylli hapoh ka Hima bad kita ki dei ki daw kiba kongsan eh”, la ong u Bah PS Lyngdoh.
Nalor kata, u Bah PS Lyngdoh u la pyntip ruh sha ki paidbah ka Hima Langrin ruh ba naduh katei ka sngi, ka Seng Samla ka la weng bad pynsangeh noh ïa ka jingïakhih hapoh ka Hima hadien ba ka KHADC ka la sngap halor ka jingdawa jong ka seng samla. Na ka liang ka seng samla ka la kyntu ruh ïa ki paidbah ka Hima ba nangne sha khmat ki dei ban ïa mih ryntih ha kino-kino ki Dorbar ba la khot da ka Hima khnang ba yn lah ban pynsngew ïa ki jingeh kiba ka Hima ka ïakynduh.
