Nongpoh, Nailar 21
U kpa jong ka samla Walinda Binong, kaba la khlad kyndit ha ka jaka pule jong ka skulbah Mody University School of Design kaba don ha Lakshmangarh ha Sikar distrik jong ka Rajasthan, u la pynpaw ïa ka jingsngewkmen ban tip ba ka National Commission for Women (NCW) jong ka Ri ka la dep mynjur bad phah ruh da ka jingthoh sha ka Sorkar Pdeng ban aiti sha ka Central Bureau of Investigation (CBI) ban tohkit halor ka jingkhlad kyndit ka khun jong u.
Haba ïoh ban ïakren bad U Nongsaiñ Hima ha ka Lah Sngi U Blei, u Bah Rubi Binong u ïathuh ba na ka liang ka ïing ka sem hi ka kwah ban ïoh ïa ka jingbishar kaba hok halor ka jingkhlad kyndit ka khun jong u, naba kum ka ïing, kim hun satia ïa ka kaiphod tohkit jong ki bor pulit ka jylla Rajasthan.
Na ka liang u Bah Rubi Binong u la ïathuh ruh ba kumba long haduh mynta, na ka liang ka ïing ka sem hi ka dang ap khmih lynti ban ïoh ïa ka jingbishar kaba hok bad pynpaw ruh ba um ngeit satia ba ka khun ka jong u, kan shim ïa katei ka sienjam kat haduh ban pynïap ïalade. Hynrei u la kynnoh ba ka don kaei-kaei sha lyndet kumba la paw ki dak ki shin ha ki bynta ka met jong ka khun jong u.
Lah ban kdew ba dei hadien ka jingïoh ïa ka jingthoh na ki bahaïing hasem ka samla Walinda ba ka National Commission for Scheduled Tribes (NCST) ruh ka la pan kaiphod na ki heh ka distrik Sikhar kum na u Deputy Commissioner bad Superintendent of Police halor ka jingkhlad noh jong kane ka samla.
