Shillong, Nailar 22
Ka Hynñiewtrep Youths’ Council (HYC) ha ka Sngi Ba-ar ka la leit ban ïakynduh bad aiti da ka dorkhas ryngkat ki mat ha u Director General Police (DGP) ka jylla, u Dr. L.R Bishnoi, IPS, ban dawa ba dei ban pynkhlaiñ ïa ka jingpahara ha ki thaiñ khappud jong ka jylla khnang ba kan don ka shongsuk shongshngaiñ ha ki thaiñ khappud.
Haba kren sha ki lad pathai khubor hadien ka jingwan ïakynduh ïa u DGP, u President ka HYC, Bah Robert June Kharjahrin u la ong ba ka seng lyngba katei ka shithi ba ka la aiti ka la kdew ïa ka bynta ban pynkhlaiñ ïa ki bor pahara ha ki thaiñ khappud katba ka mat pynbeit khappud hapdeng ka jylla Meghalaya bad ka jylla Assam ka dang ïaid khnang ban pyntikna ba ki paidbah kin lah ban shim ïa ka rai da ka mon laitluid ba kin jied ban leit sha kano ka jylla namar ba ha ki khyndiat sngi kiba la dep, ki don ki sengbhalang na Karbi Anglong kiba la byrngem byrsit ba lada ki shnong Khasi-Pnar ki rai ban leit shapoh ka jylla Meghalaya, ka lah ban mih ka kynrum-kynram kumba jia ha ka jylla Manipur.
“Na ka liang ka seng, ngi la dawa na u DGP jong ka Meghalaya ba un shim khia ba un pyntikna ba kan don ka jingïada ïa ki briew ki jong ngi kiba sah ha ki thaiñ khappud”, la ong u Bah Kharjahrin.
U Bah Kharjahrin u la ong ba ka seng ka la ai jingmut ruh ïa u DGP ba khnang ba ka shongsuk shongsaiñ kan don ha ki thaiñ khappud, la dei ban pyntreikam noh pura ïa ki 7 tylli ki Border Outposts (BOPs) kiba thymmai bad nalor kata ïa ki BOPs bad ki Out-Posts (OPs) kiba la don lypa, ka tnad pulit ka dei ban pynkhlaiñ bad ban pynbiang ïa ki tiar ki tar ha ka ban wanrah ïa ka shongsuk shongshngaiñ.
U Bah Robert u la ong ba ka seng ka la dawa ruh na utei u DGP ba ki pulit ka jylla Meghalaya ki dei ban pynkhlaiñ ïa ka jaka talasi mynder bad ki dei ban ïasnohkti lang bad ki bor synshar shnong ban tehlakam ïa ka jingwan rung kyrthlep jong ki bar jylla.
Shuh shuh ka bynta kaba lai kaba seng ka la dawa na u DGP ka long ban khmih ïa ka jingïoh rung jong u drok hapoh ka jylla bad ban don ka jingkhynra kaba kynsan na ka por sha ka por khnang ban ïoh kem ïa ki briew kiba donkti ban wanrah ïa u drok shapoh ka jylla.
“Ngi la ong ba ka dei ban don ka jingkhmih bad ka jingtreikam kaba bniah ban pynduna ïa ka jingshalan drok hapoh ka jylla ka jong ngi”, la ong u Bah Kharjahrin.
Na ka liang u DGP u la ai ka jingkular ba un sa shimkhia halor kine ki jingdawa jong ka seng bad u DGP u la pyntip ruh ba ka jylla Meghalaya ka la dep ban pyntreikam ïa kitei ki BOP ha ki 7-8 tylli ki jaka watla ki dang bun ki jingduna hangne hangtei.
