Nongstoiñ, Nailar 22
Ka jingtrei shitom bad ha ryngkat ka jingkut jingmut ban poi sha ka thong da ka nongseng, ka Kong Monkumari Kynter kaba dei ruh ka trai bad kum ka Principal ka la pynlong mynta ïa ka Tiny Tots Secondary School, Riangdo ba wat hapdeng ki jingeh hynrei kane ka skul ka la lah ban nang ïaid shakhmat bad kylla long kawei na ki skul kiba paw hapoh ka Mawshynrut Civil Sub-Division.
Ïa kane la sakhi ruh ha ka Sngi Ba-ar ka taïew ha kaba kane ka skul khlem da don mano-mano ba phai khmat la ka long na ka Sorkar bad kiwei-kiwei hynrei lyngba ka jingkyrshan jong ki kmie ki kpa jong ki spah ngut ki khynnah skul ka la ïoh ban plie ïa ki kamra Klas ki bathymmai kiba la ïa ryngkat bad kiwei pat ki skul kiba paw ha kaba u Bah Methodius Dkhar, MLA ka Mawshynrut u la long u kongsan ha ka jingdonlang u Bah M.A. Challam, SDO Civi Mawshynrut Civil Sub-Division kum u symbud kongsan, Rev. S.B. Lyngdoh, ki kmie ki kpa ki khynnah skul , ki nonghikai, ki ’riew rangbah bad kiwei-kiwei.
U Bah Methodius Dkhar haba kren kum u kongsan u la ai ka jingïaroh ïa baroh kiba don bynta ban pyntyllun sha khmat ïa katei ka skul.
U la ong ruh ba kum ki Nongmihkhmat jong ka dong bad ka thaiñ kylleng haba ki ïaid ki lap ïa ki jingduna bad u sngewthuh ba ki skul ki dei ki shlem ai jinghikai kiba long kum ka ïing kaba ar jong ki khun ki kti, hynrei bun ki jingeh ki mat ba ïakynduh.
“Nga ai ka jingïaroh bad ka jingshemphang bad trei shitom jong kane ka skul ban pynlong ïa ka kumne kumba ka long mynta khlem da don mano-mano ba noh synñiang la ka long na ka tnad ba dei peit lane na ka liang ka Sorkar bad kiwei-kiwei,” u la ong.
U la ong ruh ba na ka bynta katei ka skul un shimkhia bad un ïarap kum ka jingnang ai mynsiem bad kyrshan ruh ha kaba un ai lyngba ka MLA skhim T.6 lak.
