Nongpoh, Nailar 22
Ki nongïalam jong ka Ri-Bhoi Youth Federation (RBYF), Western Zone mynta ka sngi ki la mih shakhmat ban dawa ba ka Sorkar Jylla kam dei ban shim rai kulmar haba ïadei bad ka jingpynbeit pud ha ka wat kaba ar kumba ka la leh ha ka wat banyngkong.
Ïa kane la pynpaw da u Bah Active Pator, President ka RBYF, Western Zone bad u Bah Runningwel Syngkli, General Secretary ka RBYF, Western Zone haba kren bad ki nongthoh khubor mynta ka sngi ha Nongpoh.
Ka jingmih jong kitei ki nongïalam ka RBYF, Western Zone ka dei ruh ba ka Sorkar Jylla lem bad ki bor ba dei khmih ka Assam ki la rai ban pynbeit ïa ki ar tylli ki jaka kiba hap ha ka thaiñ Western Ri-Bhoi, kata ba kynthup ïa ka Borduar bad ka Nongwah Mawtamur ha kine ki khyndiat por ki ban sa wan.
Kitei ki nongïalam ki la ong ba kum ka seng ka dap da ka jingsngewkhia halor ka jingpynbeit pud bad kumta kam kwah ba ka Sorkar Jylla kan shu shim rai kulmar, hynrei ba ka dei ban da bishar bniah ïa ki kot ki sla halor ka jinglong trai ïa ki jaka puta, khnang ba ki jaka ka Jylla kin ym leit sha Assam.
Ki la ong ruh ba ka Sorkar kam dei ban shu shim rai da kaba phah rah kti ïa ki paidbah, hynrei ba ka dei ban tih bniah shwa bad bishar bniah ïa ki kot ki sla halor ka jinglong trai ïa ki jaka puta, ym da kaba shu phah rah kti ha ki paidbah, kumba la leh ha ka wat kaba nyngkong jong ka jingpynbeit pud kaba la ïohi bun na ki jaka ka Jylla ki la shu leit ei sha Assam.
Kumba ka Borduar bad ka Nongwah Mawtamur ki dei ki jaka kiba hap hapoh ka thaiñ Western Ri-Bhoi, kitei ki nongïalam ki la dawa ba ka Sorkar Jylla ka dei ban shim ïa ka jingmynjur naduh ki nongïalam shnong, ki Raid bad Hima ruh, kiba don ïa ki kot ki sla ban pynshisha ïa ka jinglong trai ïa ki jaka puta, ym pat da kaba shu pynrah kti ïa ki ’riew paidbah.
Kane ka jingdawa jong ka seng ka long ruh kum shi bynta ban pyntikna ba ki jaka puta kiba dei hok hapoh Meghalaya kim dei ban shu leit ei sha ka Assam ha ka kynti jong ka jingpynbeit ïa u pud u sam ha ka wat kaba ar, kumba lah dep jia ha ka wat kaba nyngkong jong ka jingpynbeit pud hapdeng kine ki ar Jylla.
