Shillong, Nailar 22
Ka jingbym lah ka Sorkar ban pynkohnguh ïa ki skul kiba don ha nongbah Shillong ban pyntreikam noh beit da ki bos kiba kit khynnah skul ka la pynlong ïa ki paidbah ban nang mad shuh shuh ïa ka dheng kali. Ym tang kata, ka la pynlong ruh ïa ka Sorkar ban hap pynïeng noh ïa kine ki bos harud khlaw ka Inter State Bus Terminus (ISBT) ha Mawlai Mawïong.
Ïa kine ki bos kit khynnah skul la pyllait paidbah ha u Kyllalyngkot mynta u snem kiba hap hapoh ka Sustainable Transport and Efficient Mobility Society (STEMS).
“Ha ka jingshisha, ka Sorkar ka la dep wad bniah bad ïoh ïa ka jingkheiñ kaba pyni ba ki don kumba 27 hajar ngut ki khynnah pule kiba wan sha ki jaka pule kiba don hapdeng ka thaiñ Laitumkhrah bad Dhankheti, bad kumba 60 na ka 100 (60%) ki khynnah ki pyndonkam da ki kali shimet ban poi sha skul bad ynda la wai skul ban leit sha la ïing”.
Hynrei ka jingbym pdiang kiba bun ki skul ïa kine ki bos kit khynnah skul, ka la buh jingeh haduh katta katta ïa ka Sorkar namar kam shym la lah ban pyntreikam ïa kine ki bos STEMS katkum jingthmu babha jong ka, kata, ban pynduna ïa ka dheng kali ha Shillong.
Kham mynshwa u Myntri Rangbah u Conrad K Sangma u la ïathuh ba bun ki skul kim long kloi ban pynïaid ïa ki bos namarba ki ong ba kamram jong ki skul ka long ban ai jinghikai ym ban pynïaid bos.
Hadien ba la sakhi ïa ka jingkhapngiah kaba shyrkhei ha nongbah Shillong, bun ki paidbah kiba la sngew dei ba ka Sorkar ka dei ban pynbor ïa ki skul bad ki kmie ki kpa ban pyndonkam beit da ki bos bad ïa kine ki bos dei ban aiti beit sha ki skul ba kin pynïaid hi lada ka Sorkar kam lah ban pynïaid hi.
Bun ki kmie ki kpa kim mon ban phah ïa ki khun da ki skul bos namar ki bos ki dei kiba kit lang ïa ki khynnah kiba leit sha kiwei kiwei ki skul ym dei tang ïa ki khynnah kiba leit sha kajuh ka skul.
