Shillong, Nailar 22
Ka Meghalaya High Court ha ka Sngi Ba-Ar ka la kyntait ïa ka mukotduma pyrshah ïa u MLA ka NPP na Williamnagar uba long ruh u Myntri ka tnat PHE, u Marcuise N Marak katba u nongmudui ïa ka mukotduma u la shah daiñ kuna T. 15,000 ha ka ïingbishar.
Haba ai ïa ka rai, ka High Court ka la ong ba kane ka mukotduma ba la ai da u Tennydard M Marak ka dei halor ka jingkynnoh ba utei u MLA ba la shah jied u la pynkheiñ ïa ki kyndon ïaleh ilekshon lane ‘Model Code of Conduct’ ha ka por jong ka ilekshon kaba la long mynta u snem.
Ha kaba nyngkong, ka ïingbishar ka la ong ba u nongmudui u la leit rah sha High Court da ka mukotduma ba la tip kum ka ‘Election Petition’, hynrei ïa kane la kyntait, bad namarkata, la weng noh ïa ka, bad u nongmudui u la wan biang sha ïingbishar da kawei pat ka mukotduma lane ka ‘Writ Petition’.
Hynrei, ka ïingbishar ka la kdew ba katkum ki aiñ, katei ka mukotduma (Writ Petition) kaba thmu ban phah kyntait noh ïa ka jingshah jied jong utei u MLA ha ka ilekshon kam long satia kaba biang bad namarkata, dei ban kyntait ïa ka.
Haba kyntait bad pynwai noh ïa ka mukotduma, ka ïingbishar ka la hukum ba u nongmudui u hap ban siew T. 15,000 sha ka Meghalaya State Legal Services Authority bad ïa kane ka pisa yn pyndonkam na ka bynta ban ïarap ïa ki paidbah ha ki kam ki jam kiba ïadei bad ka aiñ lane ‘Legal Aid’.
