Shillong, Nailar 22
Ka Central Bureau of Investigation (CBI), kaba dei ka kynhun tohkit, ka la shimti ïa ki artylli ki jingujor lane FIR bad ka la pynrung ruh da ka ‘case’ ha kaba ïadei bad ka jingshah siat ïap jong uwei na ki heh ka seng lehnoh – Garo National Liberation Army (GNLA) – kaba la jia ha u snem 2015 hadien ba ka la don ka jingkynnoh ba ka dei ka ‘fake encounter’.
Ka jingshimti jong ka CBI ïa kitei ki FIR bad ka jingpynrung ïa ka ‘case’ ka dei hadien ka hukum jong ka Meghalaya High Court ha ka 2 tarik Jymmang mynta u snem. Kine ki FIR ki kynthup ïa kawei kaba la ai da uwei u heh pulit na West Garo Hills, bad kawei pat, da u kpa jong uta u heh GNLA uba la shah siat ïap.
Lah ban kdew ba katei ka jingshah siat ïap ka la jia ha ka 4 tarik Jymmang, 2015, ha ka shnong Romba Adinggre kaba hap hapoh ka jingpeit ka thanat Rongram ha West Garo Hills ha ka por ba ki pulit ki la leit thwet ïa ki dkhot ka GNLA. Uta u heh GNLA uba la shah siat ïap u dei uba la tip kyrteng kum u Sengbat Ch. Marak.
Ha ka jingleit thwet ïa kita ki lehnoh, ki pulit ki la lap ïa kawei ka ïing kaba don hajan ka Romba Adinggre Lower Primary School ha kaba la suba ba kita ki lehnoh GNLA ki la rieh tngen hangta.
Ki pulit ki la kam ba ki la dep pyrta sha kita ki lehnoh ba kin mih shabar bad ban pyndem noh ïa ki tiar siat jong ki, hynrei kita ki lehnoh ki la siat pynban da ki ktang suloi.
Shuh shuh ki pulit ki la kam ba ha ka jingpyrshang ban ïada ïalade, ki la pynphai kylla sha kita ki lehnoh ha kaba uwei na ki nongïalam ka GNLA ïa uba la tip kyrteng kum u Sengbat Ch. Marak u la shah siat bad u la kyllon ïap hajuh.
Hynrei, u kpa jong u Sengbath, u Abal M. Sangma, uba la leit ujor mukotduma sha High Court, u la kam ha ka FIR ba u la ai pyrshah ïa ki pulit ba u khun jong u, u la shah pynïap dusmon ha ki pulit ba ki don ruh ki briew kiba la sakhi ïa kaei kaba la jia.
U Abal u la kam ba u Sengbath u la shah ïap ha uwei u briew ba la tip kyrteng kum u Mingran T Sangma bad ha kiwei pat ki pulit. Ïa ka kynhun pulit, la ïalam da u Bitching N Marak uba dei u Circle Inspector ka Tura, West Garo Hills.
Shuh shuh u Abal u la ong ba ha katei ka step, ki pulit ki la kawang da ki maw sha ka ïing ba u don u Sengbath bad ki la phah mih ïa u shabar bad ki la siat ruh sha suiñ.
Hadien ba u Sengbath u la mih shabar, u Mingran u la siat ïa u na kjat bad u la phah mareh ïa u bad hadien kata, u la siat biang ïa u. U Abal u la ong ba ki don ki briew kiba la sakhi ïa kaei kaba la jia.
“Katei ka jingjia ka dei beit ka ‘fake encounter’ ha kaba ki pulit ki la siat ïa u khun jong u nongmudui uba khlem rah suloi lane uba la khlem siat satia sha ki pulit,” la ong u nongïasaid aiñ jong u Abal ha High Court,
Ha kaba ïadei bad katei ka jingjia, ki la don artylli ki jingtohkit – kawei ka jingtohkit ba la leh da u majistor bad kawei pat da u District & Sessions Judge, Tura.
Ha ka kaiphod jong kine ki artylli ki jingtohkit, ki sakhi ki la ïathuh beit ïa kajuh bad kata ka long ba ki pulit ki la pynïap ïa u Sengbath hadien ba ki la phah ïa u ban mareh. Kine ki sakhi ki la ïathuh ba ki pulit ki la bteng ban siat haduh ba u Sengbath un da khlad.
Ban lap ïa ki jingshisha baroh, ka High Court ka la bthah ïa ka CBI ba kan tohkit halor katei ka jingjia. Kane ka kynhun tohkit ka dei ban ai ïa ka kaiphod jong ka hapoh lai bnai sha ka ïingbishar kaba dei khmih.
Ka High Court ka la bthah ruh ïa u Superintendent of Police, West Garo Hills ba u dei ban aiti ïa baroh ki kot ki sla kiba ïadei bad katei ka jingjia sha ka CBI khnang ba kan dup lah ban tohkit bniah.
Dang ha kine ki khyndiat taïew ba la lah, kata, ha ka 9 tarik Nailar, 2023, ka CBI ha Delhi ka la shimti ïa ki FIR.
Ka FIR kaba la ai da ki pulit ka dei No. 50(3)/2015 ba la pynrung ha thanat Tura, West Garo Hills hapoh ki kyndon 120/120-B/121/121-A1 122/123/353/ 307 IPC, kyndon 25 (1-A) (1-B) jong ka Arms Act bad ki kyndon 16/17/18/20 jong ka Unlawful Activities (Prevention) Act.
Ha kawei pat ka liang, ka FIR ka la ai da u kpa jong u Sengbat ka dei No. 55 (3)/2015 ba la pynrung ha thanat Tura, West Garo Hills, hapoh ka kyndon 304 (A) IPC.
