Nongpoh, Nailar 22
Hadien ka jingmih khubor ha U Nongsaiñ Hima halor ka jingai jingmut jong ka National Commission of Women (NCW) sha ka Sorkar Pdeng ban phah tohkit ha ka Central Bureau of Investigation (CBI) halor ka jingkhlad jong ka samla Walinda Binong ha ka jaka pule jong ka jylla Rajasthan, ka dkhot jong ka NCW, ka Kong Delina Khongdup ka la pynshai ba lehse ka Sorkar Pdeng kam pat ïoh satia ïa ka shithi kaba ki dang phah shen.
Kane ka jingpynshai jong ka Kong Delina ka dei hadien ba na ka liang nongthoh khubor jong U Nongsaiñ Hima u la kylli la ka Sorkar Pdeng ka la pdiang ne em ïa katei ka jingai jingmut jong ka NCW halor katei ka jingjia kaba la mih ruh ha ka kotkhubor ha ka Sngi Ba-Ar.
