Jowai, Nailar 22
U Waheh Shnong Wahïajer Narpuh, Bah Sibren Sumer, ha u kyrwoh ba u la phah u la ong ba khnang ba ki paidbah kin ym sngewthuh bakla halor ka jingkynthoh pyrshah ïa u kum u Waheh Shnong Wahïajer Narpuh halor ka jingpynsngew paidbah (Public Hearing) ka Meghalaya Cement Ltd.
Ha ka khubor kaba la mih ha ka 18 tarik Nailar, 2023, ka Wahïajer Narpuh Social & Sport Club bad ki nongshong shnong ki la pynpaw ba ka pyrshah ïa ka Public Hearing jong ka Meghalaya Cement Ltd ka ban long ha ka 24 tarik Nailar, 2023, bad la kynnoh ba la ai NOC da u Waheh Shnong Wahïajer Narpuh.
U Bah Sumer u la ong ba katei ka jingkynnoh jong u Bah Lami Mukhim bad u Bah Cheerful Surong kiba long u President bad u Secretary jong kane ka Club ka long kaba khlem nongrim bad kaba ïalam bakla haduh katta katta khamtam ïa ki paidbah ki bym tip eiei shaphang ka Meghalaya Cement Limited, Thangskai.
U Waheh Shnong u la ong ba ka Meghalaya Cement Limited ka dei ka karkhana pynmih dewbilat kaba la don ka 20 snem mynta. U la ong ruh ba la ai NOC ïa ka da ka Synjuk ki Lai Shnong- Thangskai, Chiehruphi bad Wahïajer Narpuh naduh u snem 2003. U Waheh Shnong Wahïajer Narpuh um lah ban ai NOC marwei namar kane ka karkhana ka hap hapoh ki lai shnong, la pynshai u Bah Sumer.
Nalorkata, u Bah Sumer u la ong ba katkum ka jingïaid jong ka por, ka Meghalaya Cement Ltd ka la kwah ban pynheh ïa ka jingpynmih dewbilat bad Clinker. La pdiang bad mynjur ïa kane ka jingpan ka Meghalaya Cement Ltd bad la ai NOC da baroh lai shnong hadien ba ka kompani ka la mynjur ban soi ïa ka soskular (Agreement) na ka bynta ka jingmyntoi ki paidbah jong ki lai shnong.
Kane ka jingpynheh ïa ka karkhana ka dei beit tang ïa ka jingpynmih dewbilat bad Clinker bad ym donkam ban thied jaka thymmai na ka bynta kane ka jingthmu, u la ong.
Ha ka jingïadei bad ka tdem bad u pum-pum katei ka karkhana ka la jan dep artad ban shna ïa ka Waste Heat Recovery System ban ïada ïa ka tdem lane pum-pum ban poi sha ki shnong ki thaw, la ong u Bah Sumer.
Kumta u la ong ba ka jingpynsngew paidbah ka ban pynlong ha ka 24 tarik Nailar da ka Meghalaya State Pollution Control Board, ka Synjuk Lai Shnong – Thangskai, Chiehruphi bad Wahiajer Narpuh – ka la rai ban kyrshan tyngeh ha ryngkat ka jingkyrshan lang u Dolloi, ki paidbah bad Waheh Shnong na ka Elaka Narpuh.
Namarkata, u Bah Sumer u la ong ba ka jingkynthoh ïa u Waheh Shnong ka Wahïajer Narpuh ka long tang ka jingpynthohbria bad la kyrpad ïa ka Wahïajer Narpuh Social & Sport Club ban da pyrkhat bha ha shuwa ban pynbudnam ïano-ïano.
