Nongstoiñ, Nailar 22
Ki kam tuh kam thiem ha ki shnong ki thaw jong ki bynta ka West Khasi Hills ki la sdang ban kynrei bha ha kaba ym tang na ka jingshah tuh bad shah lied ïa ki dukan lane ki ïing hynrei ka la jia ruh ïa ki jingshah tuh wat ïa ki jingri-jingdup.
Katkum ka tyllong khubor ba la ïoh lum la ong ba hynne ka step phyrngab jong ka 22 tarik u Nailar 2023 ha ka por 12.30 baje eiei, ki dkhot ka VDP jong ka shnong Diengsyiang kawei na ki shnong kaba ha ka thaiñ Nongkhnum, West Khasi Hills District ki la ïoh ban bat noh ïa ka kali kaba la pyndonkam da ki nongtuh blang.
Haba pyntikna ïa kane, na ka liang u Bah Messiah Ïawlar, President ka VDP u la ong ba ki trai blang ki la ïohsngew ïa ka jingpah jong ki blang bad kumta mar-mar ki la sngewthuh ba lah dei beit ki nongtuh bad kumta ki la mih shabar ban leit kthong ïa ki hynrei kim lap shuh namar ba ki la pynher sted ïa ka kali.
Shuh shuh la ong ba hadien ki VDP ka shnong Diengsyiang ki la kynjoh ïa kiwei ki shnong ba marjan bad dei tad haduh ba la ïoh kynjoh ktien ïa u Sordar shnong Tyngrong Wahladew ba da ka jingshimkhia jong u la ïoh ban bat ïa kitei ki nongtuh kiba la don haduh 5 ngut kynthup ïa kawei ka kynthei.
La ong ruh ba ha katei ka por katba ki dang pynlong ïa ka jingtohkit kitei ki nongtuh ki la ïoh lad pynban ban phet krad noh bad ki la ieh jyndat ïa ka katei ka kali kaba don ïa u nombar AS 01 H 3163 bad 3 tylli ki blang jong ka Kong Bijel Ïawlar ïa kaba kitei ki nongtuh ki la thmu ban tuh.
