Shillong, Nailar 22
Ka tnat kaba peit ïa ki kam pynroi ha ka Thaiñ Shatei Lam Mihngi lane Development of North Eastern Region (DoNER) ka la soi soskular bad ka UNDP na ka bynta ban ai jingkyrshan ïa ka tnat DONER ban pynsted ïa ka jingïaid shaphrang ka Sustainable Development Goal (SDG) kynthup ïa ka jingkyrshan ban kyntiew ïa ki Aspirational District bad ki Block nalor ka jingpyndonkam ïa ki kor ki bor ha ka synshar ka khadar.
Ïa kane ka soskular la soi ha nongbah Delhi ha ka jingdonlang u Myntri khynnah ka tnat DoNER, u B.L. Verma bad UN Assistant Secretary-General & Director ka United Nations Development Programme (UNDP) Bureau of External Relations and Advocacy (BERA), ka Ulrika Modéer.
Haba ai jingkren, u B.L. Verma u la ong ba ka jingphaikhmat kaba kongsan jong u Myntri Rangbahduh u Narendra Modi ka dei ka jingroi jingkiew naduh ki jingtei jingshna bad jingpynïasoh ha thaiñ Shatei Lam Mihngi bad u kyrmen ba ka UNDP kan ïarap ban pynpoi sha ka thong.
U la ong ruh ba ka NER District SDG Index ka la ïarap ban pynmih sa ïa ka skhim PM-DevINE kaba pynïoh ïa ki jingtei jingshna bad kam pynroi kiba ïarap ban kyntiew ïa ka kamai bad ki lad ban im ki paidbah hapoh ka thaiñ khamtam eh ki kynthei bad samla.
Ka Ulrika Modéer ka la ai jingïaroh ïa ka Sorkar India bad ki sienjam kiba ka shim ban pynsted ïa ka jingkiew jingroi ha ka thaiñ Shatei Lam Mihngi.
Ka la ong ba ka UNDP ka sngew donbok ban soi ïa ka soskular bad ka tnat DONER bad na ka liang ka UNDP ka kloi ban kyrshan na ka bynta ban pyntyllun ïa ki kam ki ban poi sha ka thong.
