Shillong, Nailar 22
Ka Myntri ka Sorkar Jylla, Dr. M. Ampareen Lyngdoh ha ka Sngi Ba-ar ka la ong ba ka jingmih jong ki kynhun lehnoh kam dei satia na ka daw jong ka jingkyrduh kam namar kane ka jia tang ym hapoh ka Jylla hynrei ha kylleng sawdong.
“Ngan ym lah ban shu pynïadei ïa kine…ka jingkyrduh kam ka dei ka jingjia kaba tynjuh ïa kano-kano ka ri…phi lah ban dei ka ri kaba la kiew ha ka roi ka par, phi lah ban dei kaba dang duna ha ka roi ka par, phi lah ban dei ka ri kaba la kiew ha ka ïoh ka kot ne kaba dang duna ha ka ïoh ka kot, hynrei ka jingshisha ka long ba ngin don beit ïa ka pateng bathymmai ka ban wan rung sha ka thup ka wad kam wad jam,” la ong ka Dr. Lyngdoh haba jubab sha ki lad pathai khubor la ka jingkyrduh kam ka dei ne em ka daw jong ka jingmih ki seng lehnoh.
Ka la ong ruh, “Tang namarba ym don kam, kam mut ba phin hap rah tiar noh.”
Na ka liang ka Myntri ka la ong ba ka Sorkar kan sa leh da kaba tyngeh ïa kane bad kan ym ai lad ïa kiba kum kine ki jait kam la ki long ha kano-kano ka rukom.
“Phim lah ban kynnoh ba dei tang namar ka jingkyrduh kam…ki don ruh kiwei-kiwei ki bynta bad kumta ngan ym kdew kti ïa ka jingkyrduh kam kum ka dawbah hynrei ngan ong ba ka ri kaba jop ïa ki jingtynjuh, ka Jylla kaba ithuh ïa ki jingtynjuh, kan hap ban shimkhia, ïa kaba ka Sorkar jong ngi ka leh ïa kane,” ka la ong.
Ka Dr. Lyngdoh ka la pynsngew ruh ba ka Sorkar MDA 2.0 ka trei minot ha ka ban thaw ïa ki lad ki lynti ha ka liang ka ai kam ai jam na bynta ki nongshong shnong da kaba phai khmat sha ka rep ka riang, kam jngoh kai pyrthei bad kiwei-kiwei.
“Balei u Myntri Rangbah bad ka Kynhun Myntri ki ïadon bynta ha kine kiei-kiei baroh…namar ngi kwah pyntikna ba katba lah, lyngba kano-kano ka rukom – IT, kam jngoh kai ne kiwei-kiwei ki tnad treikam kiba don ka lynti ban pynmih ïa ki kam ki jam kum ka rep ka riang, ngi hap pyntikna ba ngi leh ïa kaba bha tam ban pynbiang kam,” la ong ka Dr. Lyngdoh.
Nalor kane, ka la kyntu ïa ki nongshong shnong ka Jylla ba kim dei ban duh jingkyrmen naba ka jingkyrduh kam kam dei kaba jia tang hapoh ka Jylla, hynrei ha kylleng sawdong.
Ha kawei ka liang, haba phai sha ka jingshah kem jong ki dkhot ka kynhun lehnoh National Liberation Council of Nongkyndong (NLCN), ka la ong ba ka Sorkar kan leh da kaba tyngeh ïa kiba kum kine ki jait kam hapoh ka Jylla.
Shuh shuh haba ai khublei ïa ka tnad pulit kaba la shim ïa ka sienjam kaba dei, ka Myntri ka la bynrap, “Ka jingshah kem jong kine ki dkhot ka phah ïa ka khubor kaba khlaiñ sha kiwei pat …ngin ong em ïa ki kam lehnoh, kumba ngi la ong ha ki por mynshuwa, em ïa ki kam lehnoh.”
