Nongstoiñ, Nailar 23
Ka ïingbishar ba donburom jong ka Special Judge (POCSO) Nongstoiñ ha ka 18 tarik u Nailar, 2023 da kaba pynshong nongrim bad bishar bniah na ki sakhi satar ba la lap na ka jingtohkit, ka la rai pynrem ïa u Sheldar Syiemlieh da ka jingset patok kaba haduh 10 snem kynthih ryngkat ka kuna kaba T.20,000 halor ka jingdonkti jong u ha ka kam leh be-i-jot kaba hap hapoh ka kyndon 6 jong ka POCSO Act.
U Superintendent of Police ka West Khasi Hills District, ha ka kyrwoh khubor halor katei ka jingjia u la ong ba la ïoh pdiang ïa kawei ka jingujor (FIR) ha kaba kawei ka khynnah kynthei ba dang rit ka rta ka la shah thombor bad ïa kane ka kam thombor, la leh da u Richard Kharbani bad Sheldar Syiemlieh.
Na ka liang ki pulit ki la pynngat mukotduma pyrshah ïa kitei ki runar hapoh Nongstoiñ P.S. Case No:- 118(11) u/s 3(a)/4 hapoh ka jingtohkit jong i WPSI F.K. Marak, jong ka Nongstoiñ Women Police Station bad ïa kane ka mukotduma la mudui da i Investigating Officer hapoh ka kyndon 5(1)/6 POCSO Act.
Na ka liang ka ïingbishar ha kaba ïadei bad u Richard Kharbani pat ka la pyllait noh na kane ka mukotduma namar la shem ba um ïadon bynta ha kane ka kam runar.
