Shillong, Nailar 23
U General Secretary ka Khasi Students’ Union (KSU), samla Donald V. Thabah ha ka Sngi Balang u la ban jur halor ka jingdonkam jong ka jingïatylli hapdeng ki paid ’riewlum ka Thaiñ Shatei Lam Mihngi.
“Lada kynthup lang ïa ka jingbun paid jong ka Thaiñ Shatei Lam Mihngi baroh kawei, ngi don tang 4.52 klur, ka Jylla kaba jan tam bad ka thaiñ ka dei ka West Bengal bad ka jingbun paid ka long 10 klur. Ngim kot wat tang shiteng ïa ka jingbun paid jong ka West Bengal, kumta lada ngi ïapait-ïapra, hangno ngi ïeng, kumno ngin dawa na bynta ki hok lajong, kumno ngin ïada ïa ka lawei bad ka khyndew ka shyiap,” la ong u samla Thabah haba ai jingkren ha ka Annual Lai Freshers Meet, kaba 63 ba la pynlong da ka Lai Students’ Association (LSA).
Haba kren halor ka jingïakynad jaidbynriew ha Manipur, u la ong ba ki samla ki la duh ïa ka jingpule jong ki naba kim ïoh ban leit skul ne kolej namar ka jinglong-jingman ha katei ka Jylla.
U la ïathuh ruh ba watla ka seng kaba don lang ha ka shatri jong ka NESO ka la ïakynduh ïa ka Lat ka Jylla bad u Myntri Rangbah ka Manipur, hynrei ka long kaba shitom ban weng ïa katei ka jingeh.
“I kumba ka Sorkar Pdeng bad Sorkar Jylla kim treh ban pynkut ïa kane ka jingïakynad. Balei kane ka jingbym don mon na ka liang ka Sorkar ïa ki nongshong shnong ka Manipur. Ka Sorkar Pdeng ka la dei ban tuklar kloi ïa katei ka kam ha ka jaka ban shah ïa kine kiei-kiei baroh ba kin wan jia…bun ki mynsiem ki la duh noh, bun ki la kylla long ki phetwir, ka Sorkar Pdeng ka leh aïu,” buh jingkylli u General Secretary.
Haba kdew ba watla u Myntri Rangbahduh ka ri u la kren katto-katne halor ka jingjia ha Manipur hynrei ym shym la ïohi ïa kano-kano ka sienjam kaba tyngeh na ka Sorkar Pdeng ban pynbeit ïa ka jingïakynad bad kumta ka jinglong-jingman ka ïai bteng.
“Na ka liang jong ngi ruh ngi la pyrshang katba lah ban pynwan lang ïa ki ar kynhun sha ka miej jingïakren, hynrei kaba donkam eh ka long ïa ka Sorkar Pdeng ban tuklar khnang ba ki briew kin lah ban im biang ïa ka jingim kumba ju long,” la ong utei u samla nongïalam.
Ha kawei ka liang, u samla Thabah u la kyntu ïa ki samla ban trei minot ha ka jingpule, bad ba kin ym pynlut por ha ki kam ki bym ai jingmyntoi.
“Kynmaw ba ngi lah ban duna ha ka jingbun paid, hynrei lada ngi don ïa ka jingtbit ha ngi, kata ka imlang-sahlang jong ngi kan long kaba khlaiñ,” u la ong.
Kumjuh, haba pynsngew ba ki don tang khyndiat ngut eh napoh ka thaiñ kiba ‘pass’ ïa ka eksamin UPSC, u la ong ba la pynïaid ïa ki kam ki jam da ki briew kiba na ri-thor ki bym sngewthuh ïa ki jingsngew, ka rukom im, ka lariti bad ka riti-dustur jong ki jaidbynriew hapoh ka thaiñ.
Shuh shuh u la bynrap, “Ngi donkam shuh ïa ki IAS bad IPS napoh ka thaiñ. Hooid watla ngi don ki ’riew saiñ pyrthei na ki jaidbynriew jong ngi, hynrei ngi donkam ruh ïa ki heh ophisar na ka jaidbynriew lajong.”
