Shillong, Nailar 23
Ki samla pule ka Jylla kiba pule doktor ha Regional Institute of Medical Sciences (RIMS) ha Manipur ki lah ban ïoh ban bteng ïa ka jingpule ha North Eastern Indira Gandhi Regional Institute of Health and Medical Sciences (NEIGRIHMS) lane ha Guwahati.
Haba kylli shaphang kane, u Myntri Rangbah Conrad K Sangma u la ong ba ka Sorkar Pdeng lyngba u Myntri ka tnat koit ka khiah, u la ïakren ïa kane bad kaba sah ka long sa ban shim ïa ka rai.
U la ong ba ka Sorkar Jylla ka la dep pynsngew hakhmat u Myntri ka tnat ka koit ka khiah jong ka Sorkar Pdeng ban shim ki sienjam na ka bynta ban ailad ïa ki samla pule kiba pule doktor ha RIMS ban bteng ïa ka jingpule ha ka jaka kaba long pdeng kum ha NEIGRIHMS lane Guwahati namar ka jinglong jingman ha Manipur.
Haba kylli, la ki samla kiba wanphai na Manipur ki la leit phai biang ne ki dang don ha Meghalaya, u Conrad u la ong ba ki don kiba la leit phai katto katne bad ki don kiba khlem pat leit sha Manipur.
Kumta u la ong ba ka Sorkar Jylla ka dang ap ïa ka jubab na ka Sorkar Pdeng ba kan shim ïa ka rai ha kano ka jaka pule doktor ki samla ki lah ban bteng ïa ka jingpule.
Ki samla pule kiba pule ha Manipur ki la shah ktah bha ha kine ki khyndiat bnai namar ki la hap ban wanphai noh sha ka Jylla namar ka jingumsnam ha Manipur.
Ki don palat spah ngut ki samla pule na Meghalaya kiba leit pule ha ki jaka pule ka Sorkar Pdeng ha Manipur kynthup kiba pule doktor, hynrei ki la hap ban wanphai noh sha Jylla lajong ha u Jymmang hadien ba la mih ka jingumsnam kaba shyrkhei ka bym pat kut haduh mynta.
Dang shen ka Sorkar Pdeng lyngba ka tnat ka rep ka riang ka la sngap ïa ka jingkyrpad u Myntri Rangbah ka Jylla Conrad K Sangma ban shah ïa ki samla kiba na Meghalaya kiba ju pule ha Central Agriculture University (CAU), Imphal ha Manipur ba kin bteng ïa ka jingpule jong ki na ka jaka ai jinghikai jong ka CAU kaba don ha Kyrdemkulai, Ri-Bhoi District.
U Conrad u la pynsngew bad kyrpad ïa u Myntri ka Sorkar Pdeng uba peit ïa ka kam rep, u Narendra Singh Tomar ha ka jingïakynduh bad u ha ka 7 tarik mynta u Nailar ha New Delhi.
U Conrad u la aiti ïa ka shithi bad kyrpad ïa ka Sorkar Pdeng ba kan shah ïa ki samla pule na Meghalaya kiba pule ha CAU Imphal ba kin bteng noh ïa ka jingpule jong ki na ka shnat pule jong ka CAU ha Kyrdemkulai Ri-Bhoi District khnang ba kin bteng ïa ka jingpule khlem kano-kano ka jingduh.
Katkum ka hukum kaba pynmih da ka CAU, Imphal ha ka 14 tarik Nailar, la ong ba ka skulbah ka la rai ba ki jingai jinghikai na ka bynta ki Undergraduate kiba dei na shabar ka Manipur kiba pule ha College of Agriculture, Imphal bad College of Food Technology, Imphal jong u snem pule 2020-21, 2021-22 bad 2022-23 yn pynlong ïa ka jinghikai online.
La ong ba ka jingpynmih hukum ka CAU, Imphal, ban leh ïa kine ki jingpynbiang ka dei namar ka jinglong jingman ha Manipur, nalor ki jingkyrpad kiba la wan na ki kmie ki kpa jong ki samla pule bad na ki heh ki haiñ bad ki khliehduh jong ki Sorkar Jylla.
