Shillong, Nailar 23
Ka jaka ïeng taksi Jaïaw kaba la don palat 30 snem eiei ha Motphran kaba dei trai da ka tnat municipal jong ka sorkar jylla ka lah ban jah kyrteng noh hadien ba ka sorkar kan pynpra noh ïa kane ka jaka ïeng kali kaba don mar pyrshah ïa ka Synod Complex.
Ka jingthmu ka sorkar ban pynpra noh ïa kane ka jaka ïeng kali kaba la rim bha ka long ba kan shna thymmai noh da kawei kaba don saw mala.
Kane ka jaka ïeng ki taksi Jaïaw ka dei kaba la slem bha ha kaba baroh ki paidbah lada ki ïakut paralok ki ju ap beit ha kane ka jaka namar ka kham suk bad kaba long pdeng ïa baroh.
Ha ka jingbuddien U Nongsaiñ Hima ki nongñiah kali ki la ïathuh ba ynda la pynpra ïa kane ka jaka ïeng kali kin hap ïeng noh harud surok hajan ka jaka ïeng kali auto rickshaw Mawlai.
Ym tang ki nongñiah kali Jaïaw kiba ïakynduh jingeh, hynrei ki nongñiah taksi Mawtawar ruh kin ïakynduh lang ïa ka jingeh namar ki hap ban ïeng markhap bad ka jaka ïeng auto rickshaw Mawlai.
Kumta la sngewthuh ba ka jingdheng kali kan sa nang jur ha Motphran lada ki taksi Jaïaw bad Lawmali kiba don 50 tylli bad ki taksi Mawtawar kiba don kumba 40 tylli eiei kin ïeng noh harud surok.
Kum ban shu pynkynmaw ki nongdie jaiñ kiba don kumba 80 ngut eiei kiba shong hapoh khrum ka jaka ïeng kali ha Motphran ki la dep mih ban leit shong die jaiñ shajrong ka jaka ïeng kali Bhoi kaba don ha Garikhana.
Haba ïakren bad u Bah Robinton Kharumlong uba dei u President ka Mawtawar Taxi Driver and Owners Association, u la ïathuh ba ha ka jingïakynduh ïa ki ophisar ka tnat Municipal, ka Dorbar Shnong Mawkhar, Umsohsun bad Mission Compound ki la kular ban ai jaka ban ïeng kali harud surok haduh ban da dep shna ïa ka jaka ïeng kali kaba dang pynpra mynta.
U la ïathuh ba ka jaka ïeng kali Mawtawar ka la sdang naduh u snem 1999 kaba ka Municipal ka la ai jaka ha Motphran bad hadien ki la pynkynriah noh sha pyrshah ka Synod Complex.
U la pynpaw ba shisien ba la ïeng kali harud surok ka jingdheng kali kan don beit namar ka surok kaba rit. Pynban u don jingkyrmen ba kan nym don ka jingsahkut namar kin don ki nongpeit.
Nalor kata, u la pyntip ba haduh mynta kam shym la don ka jingïakren ynda la dep shna ïa kane ka ïing saw mala la kin wan biang ne kin nym wan shuh.
Katba ki nongñiah taksi Jaïaw ki la pynpaw ba kane ka jaka ïeng kali ka la don palat 30 snem, hynrei ki sngewbynnud ban mih noh na kane ka jaka kaba ki briew baroh ki tip lut ïa kane ka jaka ïeng kali.
