Jowai, Nailar:
Ka tnad dohkha-dohpnat,West Jaiñtia Hills District ha ka Lah Sngi U Blei ka la hiar sha ka Khatkasla ban pynshai sha ki nongshong shnong ha kaba ïadei bad ka Fish Sanctuary ne ka jaka buh ban ri dohkha.
Ha katei ka sngi la donlang u Bah B. Shylla, Fishery Supervisor, u R. Lytan Programme Manager bad u M. Nowa, Multi Service Provider, ki nongïalam shnong bad ki nongshong shnong.
U Waheh Shnong Khatkasla Bah Nangeibormi Lamare ha ka jingkren u la ïathuh ba na ka liang ka shnong ka la dep ban ai da ka dorkhas sha u Superintendent jong ka tnad Fisheries ban pynneh pynsah ïa ka wah Myntang naduh Khad Ripiang haduh Thwai Jri kum shi bynta ban ïada ïa ki dohum dohwah.
U la kyntu ïa ki nongshong shnong ban don ka mynsiem ïatreilang bad ka Sorkar khnang ban lah ban ïada ïa ka Wah Myntang bad ba kan long kum ka Fish Sanctuary.
U Bah R. Lytan Programme Manager u la pynpaw ka jingkmen ba ka shnong Khatkasla ka dei kawei kaba la ïaid shakhmat ïa ka Fish Sanctuary ban pynneh pynsah ïa ki dohum dohwah bad u la ong ba kan sa poi ka por ha kawei ka sngi kan khring ïa ki paidbah ban wan peitkai ia kane ka jaka bad kan long ruh kum ka Tourist Spot ka ban plie lad ïa ka kamai kajih jong ki nongshnong shnong.
U Bah B. Shylla Fishery Supervisor u la ong ba u sngewtynnad ban ïatreilang bad ki Waheh Shnong jong ka Khatkasla kiba ïohi jngai ïa ka jingdonkam ban pynneh pynsah ïa ki dohum dohwah.
Ki dohkha kiba don ha kane ka wah ki dei ki dohkha trai shnong ki bym donkam ban rah pateng na kiwei ki jaka bad kaba donkam mynta ka long ban pynneh pynsah ïa ki.
U la kyntu ruh ïa ki nongïalam shnong ban buh da ki ‘Signboard’ jingmaham namar bunsien hi ka mynsiem lalot ka dei ka jingduhnong ïa ka pateng ban wan.
U la kyntu ïa ki nongshnong shnong ban ïatreilang khnang ban manbha ka Fish Sanctuary.
