Shillong, Nailar 23
U Bah Bless Dkhar uba dei u President ka Hynñiewtrep National Youth Front (HNYF) East Khasi Hills. u la ong ba na ka por sha ka por la ïohi ba ki mynsiem briew ki la shu duh ei bad ki samla ki la shu lyngkien ka snam jong ki.
Ïa kitei ki kyntien u Bah Bless u la kren sha ki lad pathai khubor mynta ka sngi ka 23 tarik u Nailar, 2023 ha ka jingleit buh syntiew ha u mot jong u samla Balajied Dkhar uba dei u dkhot jong ka Hynñiewtrep National Liberation Council (HNLC) uba la shah siat ïap ha ki ktang suloi jong ki pulit ka jylla ha Nongshiliang, Nongthymmai ha u snem 2000 ha ryngkat arngut ki dkhot jong ka Khasi Students’ Union (KSU) kiba kynthup ïa u samla Dawanbiang Shullai, Assistant Finance Secretary ka KSU, CEC bad u samla Rocky Shylla, Sports Secretary ka KSU Wahthapbru Unit.
U Bah Bless u la ong ba ka jingshah siat ïap kitei 3 ngut ki samla ka dei ba ka tnad kam pohïing ka jylla ka la pyndonkam bakla ïa ka bor jong ka.
“Ngim kwah shuh ba kane ka snam jong ngi kan shu lyngkien namar uba ïap uba bun u dei u doh u snam u jong ngi hi”, la ong u Bah Bless.
Nalor nangta, u Bah Bless u la buh jingkylli balei ba ka tnad pulit kam shu kem ïa kitei ki 3 ngut ki samla kiba la shah siat ïap hynrei pynban ka tnad pulit ka la shu pyndonkam da ka bor tang namar ba ki la phong da ki jaiñ ‘uniform’ bad ki kieng ïa ki tiar ha ka met ka mut ba kin shu leh katba ki mon.
Shuh shuh u Bah Bless u la buh jingkylli ba kaei ka aiñ ba ka sorkar ka la ai na ka bynta ban ai jingïada ïa ka Jaitbynriew jong ngi namar na ka por sha ka por la ju kren ban thaw noh da ka aiñ ban ïada ïa ka Jaitbynriew bad ka jingdawa ban ai noh da ka Inner Line Permit (ILP) hynrei kitei ki jingdawa ki la shu sahkut ha suiñ.
“Lada kam don ka aiñ ban ïada dalade ïalade ym banse bad haba wan ki nongshun ki wan ban tur bad ki wan ban ïaleh ha ka ri bad ka jaitbynriew jong ngi, ka don hok ïa uwei-pa-uwei ban ïada bad ngi hap ban mih wat lada ngi hap ban ïap ruh ym lei lei”, la ong u Bah Bless.
Na ka liang u Bah Bless u la ong ruh ba ka jingbym lah jong ka seng HNLC ban wan ïashimbynta ha katei ka jingwan buh syntiew ka dei namar ba ki don ki kam ki jam kiba ïatyngkhuh bad ki ha katei ka sngi hynrei ki la shu aiti ïa utei u syntiew ha ka seng HNYF.
