Khliehriat, Nailar 23
Saw ngut ki briew kynthup ïa uwei uba la shah kynnoh donkti halor ka jingjia pynbthei bom IED ha u snem 2021 hapoh Khliehriat Police Reserve ki la shah kem noh ha ki pulit ka East Jaiñtia Hills halor ka jingkynnoh donkti ha ka kam dawa pisa.
U Superintendent of Police East Jaiñtia Hills, u Jagpal Singh Dhanoa, IPS u la ïathuh ba ha ka 19 tarik Nailar ki la ïoh ïa ka jingtip kaba thikna ba uwei u nongshong shnong na kawei ka shnong kaba hap hapoh ka thanat Lumshnong u la shah dawa pisa jubor lyngba ka ‘phone’ ha u briew u bym lah ban ithuh da kaba byrthen ruh ïa ka jingim jong u.
Ha ka 21 tarik Nailar, na ka liang ki pulit ki la buddien ïa une u briew uba shah dawa pisa bad ha ka por kumba 3 baje janmiet la shem ba u la pynïeng ïa ka kali hapoh Dosti Hotel ha Ladrymbai bad la ïohi ba arngut ki suba ki la rung hapoh ka kali jong u.
Hadien ba ki pulit ki la ïohi ïa kane, ki la ïoh ban kem noh ïa kita ki arngut ïa kiba la tip kyrteng kum u Daruis Pakem 19 snem rta uba dei na Moolaitbri Sumer, East Jaiñtia Hills, katba ïa uwei pat la buhrieh noh ïa ka kyrteng namar u dei uba dang rit ka rta.
Hadien ka jingtohkit, kine ki arngut ki la phla ba ki la lum pisa na ka bynta uwei u briew uba kylla long paralok lyngba ka Facebook.
Ha ka 22 tarik Nailar ha ka por kumba 6 baje janmiet, ki pulit ki la ïoh ban kem noh ïa uwei u briew uba kyrteng u Issei Sungoh uba dei na Dkhiah East (Ladsutnga) napoh ka ïingsah jong u.
La shem ruh ba dei une u briew uba dawa pisa lyngba ka ‘phone’ na utei u lanot, bad la shem ruh ba u la ïalong paralok bad kitei kiba la shah kynnoh donkti lyngba ka ‘Facebook’ hadien ba u la bthah ïa ki ba kin leit shim ïa ka pisa kaba la dawa na utei u lanot.
Na ka liang u SP u la ong ruh ba u Issei Sungoh, 29 snem rta, u dei uba la shah kem teng ha ki pulit ka East Jaiñtia kum uwei na kiba shah kynnoh donkti hakhmat eh halor ka jingjia bthei bom IED hapoh Khliehriat Police Reserve ha u snem 2021 bad hadien la pyllait jamin noh da ka ïingbishar.
Nalor kitei ki lai ngut kiba la shah kem, la don sa uwei pat u khynnah uba dang hapoh ka 18 snem ka rta uba la shah kem lang. Ki pulit ki la ong ba dei une uba la pynïakynduh ïa kitei ki arngut kiba la leit shim ïa ka pisa bad u Issei Sungoh.
Haduh ba la thoh ïa ka khubor, napdeng ki saw ngut kiba shah kem halor kane ka kam dawa pisa, ar ngut ki dei kiba dang rit rta.
Halor kane ka jingjia ba dang shen la pynrung da ka jingujor ha thanat Lumshnong bad ka jingtohkit ka la ïaid shakhmat.
