Shillong, Nailar 23
Ka Khasi Students’ Union (KSU) ka la ïoh jingtip ba ha kaba ïadei bad ka jingbhah pule MBBS jong ka Meghalaya lyngba ka bhah (State Quota), la don bun kiwei pat ki jaidbynriew kiba ïoh rung ha ka ‘Open Category’.
“Na ki 14 ngut kiba shah jied ban shah khmih bniah, don tang 3 ngut ki trai-ri lane ki ’riewlum katba 11 ngut pat ki dei na kiwei pat ki jaidbynriew ki bym dei ’riewlum,” la ong u General Secretary ka KSU-CEC, samla Donald V. Thabah ha kakyrwoh khubor.
Ka seng ka la ïoh jingujor ruh ba lehse kitei ki 11 ngut kim dei na Meghalaya hynrei ki dei kiba na Assam.
Ha kajuh ka por, u samla Thabah u la ong ba ka seng ka don ka jingsuba ba ki ïoh ïa ki kot ki sla na ka shnong Ampati, South West Garo Hills.
“Halor kane ka kynrum-kynram, ka KSU ka pan jingpynshai na ka Sorkar Jylla hato kitei haneng la ki dei kiba shisha ne kumno. Ka KSU ka dawa ruh ba ka Sorkar Jylla ka dei ban pyni paidbah ïa ki ‘Aadhar Card’ bad ‘EPIC’ jong kitei ki 11 ngut la ki dei ne em ki nong Meghalaya bad kumjuh na ki kolej aïu ba ki pyndep ïa ki jingpule,” la ong utei u samla nongïalam.
U la ong ruh ba ka ‘Open Category’ ka dei na ka bynta baroh ki nong Meghalaya kynthup ïa ki ‘Scheduled Tribe’ ka Jylla bad bunsien bun ngut ki Khasi ki ju ïoh ban rung ha kane ka thup kaba plie lad plie lynti pat ïa ki kiwei ki para Khasi ban rung na ka thup kyrdan Khasi-Jaiñtia.
“Katei ka jingïoh rung khlieh da ki samla pule ba suba ba dei na shabar ka Jylla kan pynduh lad ïa 11 ngut pat ki samla Khasi bad Garo kiba thrang ban ïoh pule MBBS,” u la ong.
Sa kawei pat ka mat kaba ktah jur bha ïa ka Jylla bad khamtam ïa ki samla ba dang shu dep pule ‘Medical’ kiba dei na Jylla kumba la kdew da u samla Thabah ka dei halor ka jingkhot ïa ka ‘Walk-in-Interview’ da ka Sorkar Jylla ïa 170 ki kam ‘Contractual’ kiba dei ïa ki kam Medical & Health Officer (70 tylli) bad ki ‘Specialist’ (100 tylli).
“Ka seng ka sngew ba namar ba ki dei ki kam kiba hap hapoh ka Sorkar Meghalaya, kumta ka dei ban plie lad shuwa ïa ki trai shnong ka Jylla ym ban plie kyllum lang ïa baroh ki nong India bad ïa kito kiba na ka Thaiñ Shatei Lam Mihngi,” u la ong.
Haba buh jingkylli ba balei ym ai lad ban long da ka eksamin ban pynïaid da ka Meghalaya Medical Recruitment Board, ka seng ka la ong ba ki don bun ngut ki samla na Jylla kiba la pyndep ïa ki jingpule ha ka liang ‘Medical’ bad katei ka jinglait haduh 170 tylli ki kam kan ai lad ïa ki ban thep ïa kitei ki kam lada mang beit tang ïa ki nong Meghalaya.
“Sngew thamula ba ka Sorkar Jylla ka plie pynban ïa ka lad ai kam ai jam sha baroh ki nong India. Hato ka tnad ka koit ka khiah jong ka Meghalaya ka dei jong ka Jylla ne jong ka tnad Sorkar Pdeng? Ka KSU ka dawa na ka Sorkar ba dei ban pynbeit mar-mar ïa kane ka kam bad kyntu ïa ka ba ka dei ban long ka nongaikam ïa ki trai jylla bad ym ïa ki bar jylla,” la ong u samla Thabah.
