Shillong, Nailar 23
Ki BSF Meghalaya Frontier ha ryngkat ka jingïatreilang bad ki pulit ka jylla ki la ïoh kem ïa arngut ki briew bad la kurup ruh 3,000 kilo ka shini ba la thmu ban die tuh sha Bangladesh.
Katkum ka jingïathuh ki BSF, la ong ba la ïoh ban bat ïa kawei ka kali Bolero Pik-up ha khappud hapdeng ka South Garo Hills bad Bangladesh. Kane ka kali ka thmu ban leit sha khappud ha ka por ba ka la shah bat ha ki shipai BSF bad ki pulit ka Baghmara.
Ha ka jingïathuh jong kitei ki arngut kiba la shah kem, la ong ba ki dei kiba shong ba sah ha Baghmara bad ki la kit ïa katei ka shini na Baghmara.
Ïa kitei kiba la shah kem bad ïa ka shini ba la kurup la aiti sha ki pulit ka Baghmara ba kin leh ïa kaba donkam.
