Shillong, Nailar 23
Katba nang mih ki sngi, ki jingsniew ki la nang jyllei ha kaba ki runar ki thmu ban rahbor ïa ki khynnah da kaba leh mynleh kum ki kmie ki kpa ban leit shaw skul.
Kum kane ka kam runar ka la jia ha kane ka nongbah ha kaba ki pulit ki la pynlong ka jingthwet bad buddien ban ïoh kem ïa ki runar kiba thmu ban rahbor ïa ki khynnah.
Ka khubor pulit ka la ïathuh ba ki don ki briew kiba ki leh mynleh ban leit shaw skul ha Presbyterian School, Laitumkhrah da kaba kam ki dei kpa jong u khynnah skul bad ki wan ban shaw ïa u na skul. Kine ki la pyntip sha ki nonghikai ba ki dei ki kpa jong u khynnah bad ki thok ba ka kmie jong u ka shitom bad kam lah ban wan shaw hi ïa u khun na skul.
La ong ba kine ki runar ki la leit rung ha kamra ka Principal ban pynkohnguh ba u kpa jong u khynnah u la bthah ïa ki ban wan shaw ïa u khynnah namarba baroh ha ïing ha sem ki la pang lut, hynrei ka Principal ka la pyneh bad khlem ngeit ïa kine ki runar.
La ong ruh ba ka Principal bad nonghikai ki khlem ai ïa u khun (sha ki runar), bad ka dei ka bor Blei ha kaba la pynshai ïa ka Principal bad class teacher kiba la pyllait im ïa u khyllung.
Hadien kane, kine ki runar ki la mih na kamra ka Principal bad ïakren phone bad mano-re-mano da ka ktien lajong.
Haba ïakren bad u Bah Vivek Syiem uba dei u SP (City), u la ong ba ki pulit ki dang tohkit ban ïoh kem ïa ki runar.
Na ka liang ki pulit ki dang ap ruh ban ujor ejahar, hynrei ka jingthwet ka la ïaid ban ïoh kem ïa kine ki runar. Lada ym don ba ujor ejahar, yn hap shim hi noh ban pynrung kum ka jingujor.
