Shillong, Nailar 23
Ha ka lyngkhuh sngi ïap kaba 23 snem jong u samla Balajied Dkhar uba dei u dkhot ka Hynñiewtrep National Liberation Council (HNLC), uba la shah siat ïap ha ki ktang suloi jong ki pulit ka jylla kaba la jia ha Nongshiliang Nongthymmai ha u snem 2000, na ka liang ka Hynñiewtrep National Youth Front (HNYF) ha ka 23 tarik u Nailar 2023, ka la leit ban buh ïa u syntiew uba la ai sngewbha da ka seng HNLC ha u mot jong u samla Balajied Dkhar kaba don ha u lum jingtep ka Balang U Blei, Qualapatty ha Them Mawbah.
Kum ban shu pynkynmaw hangne, u samla Balajied ha ryngkat bad arngut ki dkhot jong ka Khasi Students’ Union (KSU) kiba kynthup ïa u samla Dawanbiang Shullai, Assistant Finance Secretary ka KSU, CEC bad u samla Rocky Shylla, Sports Secretary ka KSU Wahthapbru Unit ki la shah siat ïap ha ki pulit ka jylla ha ka 23 tarik u Nailar, 2000 ha Nongshiliang katba ki dang ïakynduh lang shiparalok ha kawei ka ïing. Hynrei ha kum katei ka por, ki pulit ka jylla ki lah wan ban khynra ïa katei ka ïing bad ki lah shu synreit kuli naphang ïa kitei ki lai ngut ki samla da ka jingsuba ba ki dei ki dkhot jong ka kynhun lehnoh ka NSCN-IM.
Ha katei ka sngi leit buh syntiew da ka seng HNYF, la don ryngkat lang da ki bahaïing bahasem bad ki paralok parajor jong ka ïing ka sem u samla Balajied Dkhar.
Haba kren ha katei ka sngi, na ka liang u kpa jong u samla Balajied Dkhar, u Bah ES Ejar u la ong ba ka daw tynrai kaba la pynlong ki khun ki kti jong ka jylla ban ïaleh pyrshah ïa ka sorkar ka dei namar ba ka sorkar kum ka kmie, haba ki khun ki kti ki leh runar ha ka jingshisha ka dei ban ïaleh ban pynkylla ïa ki namar kata ka dei ka rukom ym ban shu siat pynïap ïa ki.
U Bah E.S. Ajar u la ïathuh ruh ba katkum ka kaiphod jingtohkit ka la pynpaw ba ka dei ka ‘Fake Encounter’ bad da ka mynsiem kaba sngewkhia u la ong ruh ba balei ki pulit kiba don da ki phew ngut kim shu kem ïa kitei ki 3 ngut ki samla hynrei pynban ki la shu siat ïap ïa ki.
“Lada ki don 3 ngut, ki lah ban dei na kino kino ki seng hynrei ki pulit ki don da ki phew bad ki spah ngut, kim lah ban kem da ka kti ka mut ka dei ka jingbym ler bad ka jingdkoh treikam jong ki pulit bad kim long kiba la biang ban trei ïa kane ka kam”, la ong u Bah Ajar.
Na ka liang u Bah Bless Dkhar, President ka HNYF East Khasi Hills u la pynpaw ka jingsngewnguh halor ka jinglen lade jong u samla Balajied na ka bynta ka dawbah jong ka Jaitbynriew.
“Ngi kum ka seng HNYF ruh ngim don eiei ban siew kylliang ïa u khun jong phi watla u lah duh noh ïa ka jingim lajong na ka bynta ka dawbah jong ka Jaitbynriew bad ngi ai khublei ïa phi ba phi la aiti ïa la u khun bad u para jong phi na ka bynta ka dawbah jong ka jaitbynriew,” la pynpaw u Bah Bless sha ka ïing ka sem jong u samla Balajied.
U Bah Bless u la ong ban ieid ïa ka Jaitbynriew kam da dei eh tang ha ki rynsan ban ïalap ilekshon, hynrei ban ieid ïa ka Jaitbynriew ka dei hi ban pyni da ka jinglen lade bad ki kam ki dei ban kren kham jam lada ngi ong ba ngi ieid ïa ka jaitbynriew.
Shuh shuh u Bah Bless u la ong ba la ïohi ba ha ki snem bad ki por kiba la leit katno ngut shuh ki mynsiem ba kordor ki la duh noh tang na ka bynta ka dawbah ka jaitbynriew. Kumta kum ka seng HNYF kam kwah ban shu ïohi ba ki metïap jong ki khun Khasi na ka por sha ka por kin shu jah klep bad kin shu shah siatïap.
“Lada ka jaitbynriew ka bym don hi ïa ki shipai, ka dei ka Jaitbynriew kaba la duh jingkyrmen hynrei ka Jaitbynriew kaba dang don hi ki shipai, ka dang dei hi ka jaitbynriew kaba dang don ki jingkyrmen”, la ong u Bah Bless.
