Mawkyrwat, Nailar 24
Namar ka jingsniew palat ka surok kaba la buh jingeh ïa ki nongkhaïi bad ki paidbah kiba ju leit ïew ha Nolikata Border Haat, kaba hap hapoh Ranikor Block, South West Khasi Hills District, ka KSU Ranikor Circle ha ka Sngi Balang hapoh ka jingïalam jong u samla Marconi Thongni, President ryngkat ki para dkhot, ki la leit ban hiar jurip ïa katei ïew, kaba la long kawei na ki ïew kaba ai jingmyntoi ïa ki nongkhaïi ka thaiñ khappud ban shalan ïa ki mar ki mata sha Bangladesh bad kumjuh ruh ban thied ïa ki mar Bangladesh bad die pat sha ki ïew bapher bapher hapoh South West Khasi Hills bad kiwei.
Hynrei namar ka jingsniew palat ka surok ka la kylla long pynban ka jingduhnong kaba khraw ïa ki paidbah bad ki nongkhaïi ha kaba ki kali kim nud shuh ba ïaid na kane ka lynti.
Ha kaba ïadei bad kane ka bynta, na ka liang jong u President ka KSU Ranikor Circle, u samla Marconi Thongni u la kyntu jur ïa ka Sorkar bad kumjuh ruh ïa u Syiem Hima Mawiang, uba long trai ïa kane ka ïew, ba ki dei ban shimkhia ban maramot mardor khlem da pynslem da kaba theh maw bad theh shyiap ha kane ka surok tang ban pynsuk ïa ka leit ka wan ki paidbah lyngba kane ka surok kaba jngai tang kumba 1 km eiei.
Ha kajuh ka por, u samla Marconi u la kyntu ïa ka sorkar jylla ba ka dei ban shimkhia halor kane ka bynta bad shwa ba mih u bnai tlang ka dei ban shna noh syndon da ka surok khnang ba kan ym don shuh kano kano ka jingthut ïa ki nongkhaïi kumjuh ïa ki paidbah la ka long ha ki por lyiur ne tlang.
