Shillong, Nailar 24
Ka jingbym don ki ‘street light’ ne ka bording ban ai jingshai harud surok ha ki bynta ka sor Shillong ka la pynlong ïa ki briew ba kin ïoh kabu ban shong kai ha ki jaka ba kham dum.
Ka jingbym don ki ‘street light’ harud surok kan wanrah shibun ki jingsniew namar ka buh jingma ïa ka ïaid ka ïeng jong ki paidbah khamtam ha ka miet ka ïong haba ki leit donkam kyrkieh.
Ha ka jingïaid lynti U Nongsaiñ Hima ban leit jurip ïa katto katne ki bynta ka sor Shillong naduh ka por 10 baje mynmiet, la lap ba ka surok naduh Them Bijoy shaduh Petrol Pump Anjalee ka la dum tliw-tliw namar ki ‘street light’ba la pynïeng harud surok kim shym la treikam satia.
Kane ka Them Bijoy ka dei ka jaka kaba ki briew ki kham tieng ban ïaid palat ïa ka 9 baje mynmiet namar ka jingbym shngaiñ ka jaka bad kynjah jar.
Nangta ka surok ban ïaid na Lad Lawmali sha Polo ter ter ka Wahumkhrah haba la poi hajan ka lad ban kiew sha Wahingdoh, hangne ruh kam don ‘street light’ bad ka pynlong ïa ki kali bad ki briew ba kin ïeng ban shong kai namar ka long kaba dum.
Haba poi sha Mawroh lynti ban leit sha Golflink, hangne ruh la lap ba ki kali ha ka por mynmiet ki ju ïeng harud surok namar bym don ‘street light’.
Shuh shuh na Polo sha Saw Furlong hangne ruh ka dum bha ka jaka namar ki don ki ‘street light’ tang khyndiat tangba kim da shai than. Hangne ruh ka la pynlong kumjuh ïa ki briew ban shong kai ha jaka ba dum.
Kaba kham bun bha ki kali bad ki ar shaka ban ïeng harud surok ka dei na skul BK Bajoria ter ter sha PGT College namar ki don ki ‘street light’ tangba kim da khlaiñ than. Namar kata, ki briew ki kham ïoh lad bha ban shong kai ha kane ka jaka namar ka dei kaba kham kynjah.
Kane ka jingshong kai mynmiet ha jaka badum ka long ba shisien ka sngi kan pynshlur ïa ki kam sniew. Kumta ban wanrah ka jingshngaiñ ïa ka sor Shillong ka sorkar ka donkam ban pynbun ki ‘street light’ khnang ba lada don ka jingshai kaba kham khlaiñ ha surok ki briew kin shynraiñ ban shong kai palat ïa ka 10 baje mynmiet.
