Shillong, Nailar 24
Ka jingjia shah tynrah u khynnah skul ha Laitumkhrah ka dei ka jingñiah pynkheiñ aiñ uba ñiah ïa ka ar shaka, hynrei kum kane ka rukom ñiah kaba buh jingma ïa kiba ïaid lynti ka dei kaba ki paidbah ki la ju ïohi bad sakhi man ka sngi.
Ka jingmih bun tylli ki ar shaka lehse ka pynsuk ïa ka leit ka wan jong ki katto katne khamtam namarba jur ka dheng kali. Pynban ha kawei ka liang ki don pat ki nongñiah ar shaka kiba nang pynjur ïa ka dheng kali bad buh jingma ïa ka jingim jong ki paidbah khamtam eh kiba ïaid lynti.
Dang shen ha ka jingïakynduh bad ki nongthoh khubor, la don ba buh jingkylli ïa u SP Traffic, u Dr D. Aswaghosh halor ka jingpynkheiñ aiñ ki ar shaka, kiba ju rung wat na ka liang ka bym dei ban ïaid (wrong side) bad kiba ju tur beit ban tam ïa kiwei pat ki kali (overtake) bad nang pynjur shuh shuh ïa ka dheng kali.
Une u pulit IPS ophisar u la lyngngoh pynban bad haba la kylli shi kylli, u la ong pynban ïa uwei na ki nongthoh khubor, balei phi pyrshah ïa ki ar shaka.
Ki nongthoh khubor ki kylli, ym ba ki pyrshah ïa ki ar shaka, hynrei namarba ki don ki nongñiah ar shaka kiba buh jingma shisha ïa ki paidbah kiba ïaid harud surok namar kine ki ar shaka ki ïaid beit la ka dei na kadiang ne kamon katba lait kin rung beit bad kim salia lada jur ka dheng kali ha surok ruh.
Ha ka jingshisha, katkum ka aiñ ñiah kali ha India, dei ban ñiah sha ka liang kamon, kaba mut ba kiba ñiah kim lah ban ïaid ne tur na sha ka liang kadiang lada ki kwah ban tam shakhmat (overtake) ïa kiwei ki kali ha surok.
Hynrei mynta, la ïohi ba ki don kiba ñiah ar shaka ki ñiah sted bha wat ha ki jaka ba ïaid briew bad khapngiah, bad kim salia ban rung na kano kano ka liang tangba ki la ïoh ban ïaid ban tam shakhmat ïa kiwei pat ki kali.
Ha Khyndai Lad ruh, bunsien ki ar shaka ki la tynrah bad ka don ka sien ba jan shah tynrah ki briew kiba hiar na taksi na sha ka liang kadiang, namarba ki ar shaka ki wan ïaid beit na sha ka liang ka diang ha ryngkat ka jingñiah sted.
Ka jingjia ha Laitumkhrah kam dei ka jingjia ha ka sien kaba banyngkong eh ba u nongñiah ar shaka un tynrah naphang bad pynmynsaw ïa uba ïaid lynti ban jam sha shiliang ka surok. Hynrei kum kine ki jingjia ki jia ha kylleng ki jaka namarba don ki nongñiah ar shaka kiba pynkheiñ aiñ.
