Shillong, Nailar 24
Hadien ka jingtohkit ki pulit bad thwet ban kem ïa kiba thmu ban rahbor khynnah bad kiba leh mynleh ban leit shaw skul kumba la kynnoh, 2 ngut ki briew ki la leit mih hi sha Thanat Laitumkhrah hadien ba la ïohsngew ïa ka jingshah kynnoh ba ki thmu ban rahbor khynnah skul.
Ha u kyrwoh khubor ba pyllait da u Superintendent of Police (City), Bah Vivek Syiem, la ong ba kiba leit sha Laitumkhrah Presbyterian Higher Secondary School, Shillong ki leit ban shaw ïa u khynnah klas KG hynrei la antad ba ka dei ka jingthmu ban rahbor khynnah.
Kumta hadien ka jingtih bniah bad tohkit la dep pyntikna ba ki ar ngut ki briew ki leit ban shaw ïa u pyrsa bad u khyllung ba pule klas KG da kaba shu ai da ka kyrteng sin bad kane ka la buh jingeh namar ka nonghikai kam lah ban tip kyrteng.
Shuh shuh la ong ba kane ka kyrteng sin ka dei ruh kajuh ka kyrteng bashisha jong iwei pat i khynnah ba dei lang ha kajuh ka klas. Kumta kane ka la wanrah ka jingsngewthuh bakla.
Kumta ki kmie ki kpa jong baroh ar ngut ki la leit mih sha Thanat Laitumkhrah kynthup ruh ka Principal, bad Class Teacher ka Laitumkhrah Presbyterian Higher Secondary School.
Hadien kane, la pynshisha bad pyntikna ba kane ka jingjia ka dei tang ka jingsngewthuh bakla, la ong u SP (City).
