Shillong, Nailar 24
U President ka FKJGP Jaiñtia Hills Unit, Bah Tuesday Lytep, u la ong ba ka seng ka dawa ïa ka sorkar jylla naduh u Myntri ka tnad pohïing, ki ar ngut ki MLA ka East Jaiñtia Hills District ba kin pynshai balei ki bar jylla ki nud ban hukum ïa ki pulit ban phah bom ïa ki paidbah kiba pyrshah ïa ka jingpynsngap ïa ka sur jong ki paidbah kaba la long mynta ka sngi (Sngi Palei) ha shnong Lumshnong halor ka jingthmu ban pynheh ka Topcem ïa karkhana pynmih dewbilat.
U Bah Lytep u la ong ba ki ar ngut ki MLA ka East Jaiñtia Hills, u Bah Kyrmen Shylla uba dei u Myntri ha ka sorkar jylla uba mihkhmat ïa ka Khliehriat bad ka Kong Santa Mary Shylla kaba mihkhmat ïa ka Sutnga-Saipung ki dei ban pynshai halor ka jingshah bom ki paidbah kiba la mynsaw.
Kumta, u la ong ka seng kan sa hiar thma ha kano-kano ka por ïa katei ka Topcem lada ka sorkar kam lah ban pynshai halor ka jingshah bom ki paidbah haba ki pyrshah ïa katei ka jingkwah pynïar treikam katei ka kompani pynmih dewbilat.
“Kum ka seng ngi sngewsih ban ïohi ba ki trai jylla kin shah shoh tang namar ba ki bar jylla ki hukum ïa ki pulit ban shoh ïa ki bad katno ka jingtlot bor pulit ba kin kohnguh ïa ka jingbthah jong ki” u la ong.
Nalor kane, u la ong ba ka seng ka la dep ïoh sakhi lut ïa ka jinglum pisa be-aiñ ki pulit ha surok bah bad lada ki pulit ki thombor ïa ki paidbah ki hap ban ujor pyrshah ïa ki.
Namar kata, u la ong ba ka seng kan nym sngap jar shuh haba ïohi ïa kane ka jingshah shoh shah bom ki paradoh kiba pyrshah ïa kane ka jingwan lum spah ki bar jylla.
