Jowai, Nailar 24
Ka Dorbar Shnong Lapangap hapoh West Jaiñtia Hills District ha ka Sngi Palei ka la pynlong ïa ka jingthung tynrai dieng ha jaka jong ki tynrai ba la shah pynjulor ha ki Karbi ha u Lum Moo Pyrdet Pynthor, Lapangap.
Ha ka jingïakren bad ki lad pathai khubor, u Waheh Shnong ka Lapangap, u Bah Deimonmi Lyngdoh, u la ong ba ka Dorbar Shnong ka la rai bad thung da ki tynrai dieng kseh ha utei u lum khnang ban pynskhem ïa ka jinglong trai halor ki jaka ki pura kiba hap hapoh u tei lum.
U la ong ba katba ki nongshong shnong ki dang muja ban thung ïa kitei ki tynrai dieng kseh, hadien katto katne por la sakhi ba la mih ka tdem na ka thaiñ Karbi.
U la ïathuh ba ym pat lah ban tip la kata ka tdem ka dei ba ing ka ïing ne ïing trep, hynrei ki Karbi pat ki la kynnoh ba la thang da ki nongshong shnong ka Lapangap. Hynrei na ka liang u Bah Deimonmi u la kyntait ïa kane ka jingkynnoh jong ki Karbi, bad u la ong ba ka dei tang ka buit sianti jong ki.
U la ïathuh ba na ka liang ki Karbi la wan da ki pulit Assam bad na ka liang ka Lapangap la don ki pulit ka Saitsama Police Outpost ban ai jingïada ïa ki.
Lah ban pynkynmaw ba ki nong Karbi ki la pynjulor da ki hajar tylli ki tynrai dieng ba la thung ki nong Lapangap ha utei u lum ha u bnai Naitung bad kumjuh ruh ha ka 18 tarik Nailar ba la ai da ka tnat Basin Development naduh u bnai Jylliew ban pynjyrngam ïa ki sawdong sawkun.
