Shillong, Nailar 24
Khyndai ngut ki pulit ka East Jaiñtia Hills ki la mynsaw ha ka Sngi Palei ha Thangskai ha ka jingïakynad bad ki paidbah kiba la pyrshah ïa ka jingpynsngew paidbah lane ka ‘Public Hearing’ ba la pynlong ha shlem jong ka karkhana Meghalaya Cements Limited.
Ha u kyrwoh khubor, u SP ka East Jaiñtia Hills, u JS Dhanoa, IPS, u la ong ba ha ka por kumba 11 baje mynstep, la thmu ban pynlong ïa ka jingpynsngew paidbah ha kaba ïadei bad ka jingkwah jong katei ka karkhana ban pynkiew ïa ka jingpynmih dewbilat na ka 2,600 TPD sha ka 4,500 TPD bad ka jingbuh ïa ka shlem pynmih bording kaba 10 MW Captive Power Plant (CPP) bad ka Waste Heat Recovery System (WHRS) kaba 9.5 MW.
U SP u la ong ba katba ka jingpynsngew paidbah ka la sdang, ki paidbah kiba don kumba 100-150 ngut ki la wan sha katei ka jaka bad ki la pynjulor ïa ka dara bad ki shuki ba la buh na ka bynta kane ka kam. Ha kajuh ka por, u la ong ba kita ki briew ki la pyrshang ban thang syndon ïa ka dara.
“Namar ka jingdon jong ki kynthei bad khynnah ha katei ka jaka, ki pulit ki khlem pyndonkam da ka bor ban pynpra ïa ki paidbah,” la ong u SP.
Shuh shuh u la ong ba hadien ka jingïakren bad ki bor distrik, Meghalaya State Pollution Control Board, nongïalam shnong bad ki heh jong katei ka kompani, la rai ban pynkynriah ïa ka jaka ban pynlong ïa ka jingpynsngew paidbah sha ka ‘Hall’ kaba don hapoh ka shlem jong katei ka karkhana.
Hynrei u SP u la ïathuh ba ha ka por 2 baje nohphai sngi, ki la don biang ki paidbah kiba la wan ban tur sha katei ka jaka (Hall), da ka jingthmu ban thaw huri-hura bad pynjulor ïa ki mar ki mata.
“Wat la ngi la pyrshang ban kyntu ïa ki paidbah, hynrei ki la nang khluit pynban bad ki la pyni bor. Ki la kawang ruh da ki maw kaba la buh jingma ïa ka jingim jong ki paidbah, ki heh jong ka distrik bad ki pulit,” la ong u SP.
Kumta ban teh lakam bad ban pynpra ïa ki paidbah, u SP u la ong ba ki pulit ki la pyndonkam da ka bor ka bym buh jingma ïano-ïano. Hynrei ha kane ka jingjia, u SP u la ong ba 9 ngut ki pulit ki la mynsaw.
Ha kaba ïadei bad katei ka jingjia, u SP u la ong ba la pynrung da ka jingujor ha thanat Lumshnong hapoh ki kyndon 143/144/145/148/152 IPC.
