Khliehriat, Nailar:
Hadien ba ka shlem treikam DC Supply jong ka East Jaiñtia Hills District ka la phah ïa ka tnad ba kan leit thew kilo ïa u khaw uba don hapoh Pamrakmai FPS Centre, la lap ïa ka jingduna thew jong man la ki byrni khaw ïa kaba ki Govt. Wholesaler ki kheiñ ba u don 49 ne 50 kilo hynrei la lap ba ki don ha ka jingthew kaba tang 42,40,39,38, 37 bad 36 kilo shi byrni.
Kane ka jingwan thew ka dei hadien ba ka la mih ka jingeh bad ka jingujor ha kaba ïadei bad ka jingïoh duna ïa u khaw rashon ba la pyllait da ka shlem treikam u DC Supply ka East Jaiñtia Hills District, kaba la pynlong ïa ka Vigilance Committee ba la lamkhmat da u Secretary uba dei ruh u Secretary Shnong, u Bah Wellson R.D. Siangshai ba kin leit ban pynsngew ïa kane ka jingeh sha utei u heh ka distrik.
Ïa une u khaw rashon la sam da ki nongsam khaw rashon ka Pamrakmai FPS Centre ba la sam da ka Ïahunlang V.O Pamrakmai Village, East Jaiñtia Hills District kaba la pynsngew ïa ka jingeh halor ka jingduna kilo palat u khaw rashon ba la pyllait da ka shlem treikam u DC Supply, EJH ka la don shibun ka jingkhñium bad ka jingkynnoh na ki nongïoh khaw rashon (Ration Card Holder) ïa ki ‘dealer’ nongsam khaw ha ka shnong halor ka jingbym biang kilo bad duna ka jingïoh khaw.
Ha kane ka jingwan thew kilo ïa u khaw rashon kaba la pynlong ha ka Sngi Ba-Ar, la don lang ka Kong E.V. Pariat, S.I Supply Khliehriat, u H. Tyngkan Office Assistant Supply Branch Khliehriat, ka Government Wholesaler, ka Kong S. Bareh ryngkat ka FPS Dealer bad ki dkhot ka Vigilance Committee jong ka Shnong.
Ha ka shi bnai, ka Wholesaler ka pynpoi kumba 107 byrni u khaw rashon jong ka shnong bad hadien ba la thew ïa kitei ki 107 Byrni la lap ba la poi tang 43 quintal 1 kilo bad 845 Grams na ka 53 quintal, 68 Grams ba kane ka FPS Centre ba ka dei ban ïoh ha man la u bnai.
Na katei ka jingthew la lap ba ka jingduna kilo u khaw ka long 10 quintal 66 kilo bad 155 gram ne haba kheiñ kyllum ka long palat 1660 kilo tam.
Ka shnong Pamrakmai ka don 16 tylli ka Card AAY, 176 tylli ka Card PHH bad 24 tylli ka card Non-NFSA.
Te ka jingïoh ïa u khaw rashon kan long 53 Quintal 68 Grams. Ka jingduna kilo haduh katne ka la ktah shi kat dei eh ïa ki FPS Dealer Rashon ban pynbit pynbiang sha ki nongïoh khaw rashon.
Hadien ba la lap ïa kane ka jingshisha baroh na ka liang ka Vigilance Committee jong ka shnong ka pynpaw ka jingsngewnguh ïa u DC (Supply) East Jaiñtia Hills District uba la kloi ban shimkhia bad sngap ïa ka jingpynsngew halor kane ka jingeh ba ka shnong ka ïakynduh. Na ka liang jong u, u la pynsngew ban leh ïa kaba donkam pyrshah ïa ki Government Wholesalers halor kane ka bynta.
Lah ban kdew ba kane ka juh ka jingeh bad jingkynnoh ba ka jingduna kilo u khaw rashon kam dei tang ha kane ka shnong hynrei ha man la ki FPS Dealer jong ka distrik bad ha ka Jylla hi baroh kawei.
Kumta na ka liang ka Vigilance Committee bad ka Dorbar Shnong Pamrakmai EJHD ka kyrpad bad kyntu ïa ki bor sorkar ba dei peit ba ki dei ban pynbeit bad tih bniah halor kane khnang ba kan ym ktah ïa ki nongïoh khaw rashon ha ka Jylla.
