Shillong, Nailar 24
Ka Myntri Khynnah ka Sorkar Pdeng kaba peit ïa ka tnat ka koit ka khiah ka Dr Bharati Pravin Pawar ka la lum jingïalang ha Secretariat ha Shillong ban khmih ïa ka jingtreikam ki jaka sumar bad ka tnat ka koit ka khiah bad rukom pyntreikam ïa ki skhim ka Sorkar Pdeng ha Meghalaya.
Ka Myntri ka Sorkar Jylla ka Kong Ampareen Lyngdoh bad kiwei ki ophisar ki la donlang ha kane ka jingïalang.
Kane ka Myntri Khynnah ka la ïakynduh ruh ïa u Lat ka Jylla.
Ka Dr Bharati ka la leit ruh sha NEIGRIHMS ban lum ïa ka jingïalang bad ki ophisar kane ka aspatal kaba dei ruh ka jaka pule doktor. Ka la ïathuh ba ki don shibun ki sienjam kiba la shim ban pynkhlaiñ ïa ki lad jingsumar bad ki skhim bapher bapher kiba pyntreikam ha kylleng kynthup ha Meghalaya.
Ka la ong ba naduh 2015, la mang pisa shuh ban ai ïa ka NEIGRIHMS ban shna medical college bad kyntiew ïa ka jingdon kiba pule doktor MBBS ha kaba naduh u snem ban wan, kata 2024, yn kyntiew shuh sa 50 ngut, kaba mut ka NEIGRIHMS kan don noh 100 ngut kiba pule doktor MBBS.
Halor ka pisa ba mang bad ai ïa ka NEIGRIHMS, ka la ong ba ha u snem ba la dep la mang T. 480 klur bad mynta u snem ka mang tyngka ka long T.528 klur.
Haba ïadei bad ki skhim lyngba ka National Health Mission, ka Dr Bharati ka la ïathuh ba ka pisa kaba la ai sha Meghalaya mynta u snem la antad kumba T.600 klur ha kaba 10 % yn ai lang ka Jylla.
Hapoh ka Emergency Covid Relief Package-1, ka pisa ka long T. 25 klur na bynta ka Meghalaya bad hapoh ka Emergency Covid Relief Package-2 ka long T. 117 klur.
Lyngba ka 15th Finance Commission, ka Sorkar Pdeng ka ai T. 150 klur ïa ka Meghalaya ban pynkhlaiñ ïa ki Sub Centre bad ki Health and Wellness Centre.
Halor ka Pradhan Mantri Ayushman Bharat Health Infrastructure Mission, kane ka Myntri ka la ïathuh ba la mang T.150 klur ïa ka Meghalaya ha kine ki 4 snem.
Haba ïadei pat bad ka Pradhan Mantri Jan Aarogya Yojana (PMJAY) Meghalaya, la ong ba ki don 18 lak ngut kiba ïoh myntoi bad kumba 5 lak ki Card la dep sam.
Kumta ha ka Sngi Thohdieng, ka Myntri kan leit sha East Jaiñtia Hills district.
