Jowai, Nailar 24
Hapdeng ka jingkulmar namar ka jingïakynad ki paidbah bad ki pulit ha Thangskai, East Jaiñtia Hills ha ka Sngi Palei, ka jingpynsngew paidbah lane ka ‘Public Hearing’ ha shlem jong ka Meghalaya Cements Limited ka la ïaid beit ha kaba kiba la ïashim bynta ki la ïa rah kti lut ban kyrshan ïa kane ka karkhana shna dewbilat.
Ka Meghalaya State Pollution Control Board ka la khot ïa kane ka jingpynsngew paidbah ban sngap aïu ki don ban ong halor ka jingthmu ka Meghalaya Cements Limited ban pynïar ïa ka jingpynmih dewbilat na ka 2,600 TPD (0.858) sha ka 4,500 TPD (1.485) bad ka 10 MW Captive Power Plant bad ka 9.5 MW Waste Heat Recovery System (WHRS).
Ha ka banyngkong, la thmu ban pynlong ïa kane ha madan ïalehkai phutbol. Hynrei namar ka huri-hura, la pynkynriah noh shapoh ka Community Hall jong katei ka karkhana.
Ha kane ka jingpynsngew paidbah ba la pynlong hapoh ka Community Hall, la don lang u Additional Deputy Commissioner ka East Jaiñtia Hills, u Bah G Warjri, ki ophisar na ka State Pollution Control Board, ki heh ka karkhana bad ki nongkyrshan. Ki paidbah kiba la don ha kane ka kamra, ki la ïa rah kti lut ban pynpaw ïa ka jingkyrshan ïa kitei ki jingthmu jong ka karkhana.
U Bah Warjri ha ka jingïakren bad ki lad pathai khubor u la ong, “Ha kane ka jingpynsngew paidbah, ngi la ïoh ban pynsngew halor ka jingthmu jong ka kompani. Ngi la ïohsngew ïa ka jingpynsngew na ka liang ka kompani, bad hadien kata ngi la khot ïa ki briew ba kin ai kano-kano ka jingpynsngew kat kaba ki don katkum ka jingsngew jong ki. Katto katne ki la wan ban ai jingkren bad ngi la buh rekod lut baroh.”
Haba kylli ha kaba ïadei bad ka jingjia ïa ki paidbah kiba pyrshah ïa katei ka jingïalang, u Bah Warjri u la ong ba um don jingtip eiei halor ka jingpyrshah jong ki paidbah namar ba u shu wan sha kane ka jingpynsngew paidbah kumba la bthah da u Deputy Commissioner bad u la pyndep ïa la ka kamram.
