Shillong, Nailar 24
Uwei u khynnah ba pule ha ka Class XI u don hapdeng ka jingshah sumar ha GNRC, Guwahati hadien ba u la mynsaw na ki bynta jong ka kjat bad khlieh namar ka jingshah tynrah ha uwei u nongñiah ar shaka uba la ñiah thurmur.
Kane ka la jia ha ka por kumba 10:55 mynstep hajan ka Don Bosco Technical School ha Laitumkhrah katba utei u khynnah skul u dang pyrshang ban jam na shiliang sha shiliang surok. Ha ka por ba u dang ïaid ban jam sha shiliang surok, kynsan-kynsan ka la wan ka ar shaka kaba dei ka Scooty Aerox bad u nongñiah u la tynrah beit ïa uta u khynnah.
Katkum ka jingïathuh jong ki pulit, nalor u nongñiah, la don sa uwei uba shong hadien ka ar shaka. Ïa utei u khynnah uba la shah tynrah la pynkit da kawei ka Local Taxi sha Woodland Hospital. Nalorkata, ïa u nongñiah ka ar shaka lem bad uba shong nadien la ïalam lang sha hospital namar ma ki ruh ki la mynsaw lang.
Ki pulit ki la ong ba utei u khynnah uba la shah tynrah u la mynsaw na ka liang ka kjat kamon bad na khlieh. Kumta na ka liang bahaïing hasem jong u, ki la pynkit noh sha GNRC ha Guwahati ban ïoh ïa ka jingsumar kaba kham biang. Ki pulit ki la ïathuh ba kumba ka long mynta, utei u khynnah um da don than ha ka met kaba shitom.
Ki pulit ki la kem noh ïa u nongñiah jong katei ka ar shaka bad ki la pynrung ruh da ka jingujor.
