Shillong, Nailar 25
Ka jingpynkhreh ïa ka ilekshon MDC ha Mawlai konstitwensi ka la sdang ïaid shaid-shaid namar haduh mynta kiba la pynpaw kyrteng ïalade ban pan tiket na ka Voice of the People Party (VPP) ki la don haduh hynñiew ngut.
Kine ki hynñiew ngut kiba pynpaw ba ki kwah ban pan tiket na ka seng VPP ki dei ruh ki nongkyrshan kiba hakhmat bad kiba trei shit rhem ban pynjop ïa u Bah Brightstarwell ha ka ilekshon MLA.
Haba ïakren bad u MLA ka VPP na Mawlai konstitwensi, Bah Brightstarwell Marbaniang u la pyntip ba haduh mynta ki la don kumba hynñiew ngut kiba la pynpaw ba ki kwah ban pan tiket na ka seng VPP na ka bynta ka ilekshon MDC 2024.
U la ïathuh ba ïa kine ki hynñiew ngut yn sa bishar da ka Election Committee jong ka VPP ynda la dei ka por ban khot ïa kiba kwah pan tiket.
“Ngan nym ïakhun ïa ka ilekshon MDC, namar nga kwah ba uwei u briew kawei ka shuki, namar kata nga kwah ban ailad ïa kiwei ban ïakhun ïa ka MDC” u la ong.
Na ka liang u Bah Brightstarwell um shym la pynpaw ïa ki kyrteng hynrei u la shu ïathuh ba ki la don kiba pynpaw ba ki kwah ban pan tiket. Kumta u don jingkyrmen ba ka seng kan sei ïa u briew uba biang.
Kum ban shu pynkynmaw ha ka ilekshon MLA u Bah Brightstarwell u la ïoh haduh 24,262 vote.
Kat haduh mynta ki kyrtong kiba la pynpaw ban ïakhun ïa ka ilekshon MDC na Mawlai konstitwensi ki long u Bah Teibor Pathaw uba dei u MDC ba mynta, u Bah PT Sawkmie na ka UDP, u kyrtong ka VPP bad kiwei seng saiñpyrthei ki ban sa pynïeng ynda la jan ka ilekshon.
