Shillong, Nailar 25
Ka [24]7.ai, kum ka nongïalam salonsar ne global leader ha ka intent-driven customer solutions and contact center services, ha ka 25 tarik u Nailar 2023 ka la pyllait ïa ki lai tylli ki Community Development Program kiba pher (Project Udaan, Project Nirmalya bad ka Women empowerment), kum shi bynta na ka jingbteng ban wanrah jingkylla ha ka roi ka par jong ka jylla Meghalaya.
Ïa kitei ki prokram ha katei ka sngi la pyllait paidbah da u Myntri Rangbah ka jylla, u Conrad K Sangma ha ryngkat ka jingïadonlang bad kiwei kiwei ki heh ophisar.
Ha katei ka sngi la ïoh ruh ïa ka jingkren na ka Nina Nair, Senior Vice President, HRD Head – India and Americas, [24]7.ai, u Namit Jauhari, Country Head India, [24]7.ai bad na u Gaurishankar Vaishnav VP and Center Head, Hyderabad and Shillong, [24]7.ai.
Ka [24]7.ai ka dei ka kompani kaba nyngkong eh ban buh ïa ka international BPO ka ba la trei kam ha Shillong ha ki ar snem kiba la dep. Kane ka la nang ïar ka jingtreikam naduh katei ka por ha kaba ka long ka jingplie lad na ka bynta ki samla ha kylleng ka jylla.
Kum shi bynta na ka jingdon ïa ki kam kiba pher, ka Project Udaan, ka long ka lad ka ban plie na ka bynta ki khynnah samla ba kin tip shaphang ki lad trei ba tip kum ka new technology, kaba long ka lad ïa ki ba kin ïoh kam bad ruh ba kin lah ban pyntbit ïa ka jinglah ban pynïadei jong ki bad kiwei lyngba ka BPO sector.
Nalor kane ka [24]7.ai ka kyrshan ruh ïa ki longkmie ba kin lad ban ïoh kam ïoh jam. Da kaba ai jinghikai pyntbit ïa ki ha ki liang bap her, kum ka Tally, ki kam ophis, ñiah kali, suh jaiñ bad ruh kum ki beautician, kane ka kompeni ka trei na ka bynta ban kyntiew ïa ka jinglong laitluid ki longkmie ha Meghalaya ba kin lah ban wanrah ïa ka roi ka par ha ka jylla.
Kawei pat ka lad ai kam lane ka projek kaba lai ka dei ka Project Nirmalya, kaba ka jingthmu ka long ban khmih bniah bad ruh ban ïaleh ban weng ïa ka jingiehnoh skul ba tang shiteng por jong ki khynnah na ka daw ka jingbym biang ka jingkhuid jingsuba bad ruh ki jaka leit shabar.
Ka jingthmu ka long ban shna ïa ki paiñkhana kiba khuid na ka bynta ki khynnah, ka jingthmu jong kane ka projek ka long ban pynlong ïa ki khynnah ba kin wan beit sha skul bad ruh ba kin don ka jingsngewtynnat ban pule. Ïa mynta don 14 tylli ki paiñkhana ha ki 5 tylli ki skul [24]7.ai bad ka jingthmu ka long ban shna haduh 50 tylli ki paiñkhana ha kaba kut jong une u snem.
Haba ïakren ïa kine ki lad trei kam, u Myntri Rangbah, u la ong ba ka ka long kaba sngewkmen ban ïohi ïa ka jingkiew bad ka jinglah ka [24]7.ai kaba pyrshang ban wanrah jingkylla ha Meghalaya bad ka jinglah jong ki ban wanrah ïa ki lad trei kam bad ruh ban kyntiew ïa ka roi ka par da kaba pyntrei kam ïa kiba bun ki projek ban ai kam ïa ki khynnah samla shynrang bad kynthei bad ruh ban wanrah ka jingbha na ka bynta ki khynnah skul ka long kaei kaei kaba ngi donkam ban ïakren.
U la ong ba u kwah ban ïohi ba katei ka kompani haba ka wan shane ym tang ba kan wan kum ka kompani ne ki briew kiba shu wan shane tang ban ïoh jingmyntoi hynrei u kwah ban ïohi ïa ki ba kin ïatreilang hapoh ka jylla.
“Ngi sngewkmen ban ïohi ïa ka jingkiew bad ka jinglah ka [24]7.ai kaba pyrshang ban wanrah jingkylla ha Meghalaya. Ka jinglah jong ki ban wanrah ïa ki lad trei kam bad ruh ban kyntiew ïa ka roi ka paw da kaba pyntrei kam ïa kiba bun ki projek ban ai kam ïa ki khynnah samla shynrang bad kynthei bad ruh ban wanrah ka jingbha na ka bynta ki khynnah skul ka long kaei kaei kaba ngi donkam ban ïakren”, la ong u Myntri Rangbah.
U la pynbna ruh ïa ka jingplie paidbah ïa ka Integrated Command Centre ha Shillong kaba dei shibynta jong ka Smart City Project bad u la ong ruh ba ha ki taïew ban sa wan, ka sorkar jylla kan sa pyllait ïa ki rukom treikam ka IT jong ka jylla.
Ki khynnah samla ki donkam ban wan shim bynta ha ka jingai jingpyntbit kaba 20 sngi lynter, ïa kaba yn nang ai jinghikai shuh shuh ïa ki. Ka [24]7.ai’ ka ai jinghikai kaba ki lah ban sngap ne leh na ïing ha ka BPO sector ka ban hikai ïa ki kumno ba kin lah ban rung sha kane ka kompeni bad ruh ba kin im da ka kamai jong ki. Kane ka rukom ai kam ïa ki khynnah samla ka dei ruh ka lad ba kin lah ban sngewthuh ïalade shimet bad ruh ba kin pynsngewthuh ïa kiwei pat ki samla kiba don sha ka imlang sahlang kaba dang sahdien. Ïa ka jingsam syrnot yn leh hadien ba ka jingshah hikai pyntbit kan kut. Hadien kata ka [24]7.ai kan sa tyrwa ïa ki ha kano ka liang ba ki sngew dei ban sngew long ban trei shipor.
