Khliehriat, Nailar 25
Ki nongtrei trai jylla hapoh ka karkhana dewbilat Meghalaya Cements Limited lane Topcem kiba don hapoh ka synjuk jong ka Topcem Employees Association ha ryngkat ka jingkyrshan ka Khasi Students’ Union (KSU) Narpuh ki la dawa na kane ka kompani ba ka dei ban weng noh mardor hapoh 24 kynta ïa ki arngut ki nongtrei bar jylla kiba la pynshit ïa ki bor pulit ban bom ïa ki paidbah ha ka jingpynsngew paidbah ha Thangskai.
U President ka Topcem Employees Association, u Bah D Malang bad u Assistant Secretary, u Bah A Passah, ki la ong ba ki la phah da ka jingthoh sha u Senior President ka Meghalaya Cements Ltd, Thangskai.
Kine ki nongtrei ki la pynrem jur ïa katei ka jingleh jong kitei ki nongtrei bar jylla ïa kiba la tip kyrteng kum u Arun Kejriwal (AVP) bad u Umesh Kumar uba dei u GM Mines bad ki la dawa ruh ban weng kam noh ïa ki mardor namar ka jingdonkti ban pynshit ïa ki bor pulit ban bom naphang ïa ki paidbah hadien ba ka la mih ka jingïakynad hapdeng ki pulit bad ki paidbah ha ka por ba pynlong ïa ka ‘Public Hearing’.
Na ka liang ka KSU ruh ka la leit ai da ka jingujor sha ki bor pulit na ka bynta ban kem noh mardor ïa kine ki arngut ki bar jylla kiba donkti ha kane ka kam kynshoit bad pynshit ïa ki bor pulit kiba dang don ha la ka jong ka kam.
Ha kawei pat ka khubor ka HITO East Jaiñtia Hills ruh mynta ka sngi ka la ujor da ka ejahar ha thanat Lumshnong pyrshah ïa kitei ki arngut ki nongtrei ka karkhana.
Ha kawei pat ka liang, u Superintendent of Police, East Jaiñtia Hills District, Khliehriat ha ka Sngi Thohdieng u la pyntip ba ki pulit ki la pynrung da ka jingujor ïa ki briew kiba la donkti ban pynshit ïa ki bor pulit ha ka por ba la thmu ban pynlong ïa ka jingpynsngew paidbah ne ‘Public Hearing’ ha ka Sngi Palei ha Thangskai.
Une u heh pulit u la pyntip ba ha ka Sngi Palei ha ka por ba pynlong ïa ka jingpynsngew paidbah hapoh ka jaka jong ka Meghalaya Cements Limited kaba don ha Thangskai ka la mih ka jingïakynad hapdeng ki pulit bad ki paidbah kiba la pynlong ïa ka jingïakhih. Kawei na ki dur khih (video) kaba pyni halor kane ka jingjia ka la pynpaw ïa ki katto katne ngut ki briew kiba pyrta da ki kyntien pynshit.
Halor kane na ka liang ki pulit ki la pynrung da ka jingujor (No. 46(08)2023) hapoh ki kyndon 153B/503/504/506 IPC ha thanat Lumshnong bad ka jingtohkit halor kane ka la ïaid shakhmat.
Shuh shuh utei u heh pulit u la ong ruh ba ka tnat pulit ka jylla ka khmih na ka bynta ban pynneh pynsah ïa ka jingsuk hapdeng ki jaitbynriew bad kano kano ka jingpyrshang ban leh ïa ki kam kynshoit bad pynshit kin ngat ha ki kyndon jong ka aiñ.
