Ka Sorkar MDA ka long pyrshah paidbah, don jingma ka synshar paidbah: VPP

Ka roi ka par kam dei ban ktah pat ïa ki paidbah bad ka mariang. Ka hok na bynta ka jingïakhih ba jai-jai ka dei ka hok longbriew-manbriew.

Shillong, Nailar 25 

Ka Voice of the People Party (VPP) ka pynrem jur ïa ka jingleh don bor jong ki bor distrik bad tnad pulit pyrshah ïa ki nongshong shnong ba lui-lui bad bym don tiar ba kynthup ïa ki kynthei kiba la pyrshah ïa ka jingpynsngew paidbah jong ka Meghalaya Pollution Control Board (MPCB) na bynta ban pynïar ïa ka Meghalaya Cements Ltd ha Thangskai.

“Kane ka jingjia ka kdew shai ba kane ka Sorkar MDA ka long pyrshah paidbah bad kaba long la kloi ban poi haduh u pud ban shim kabu ïa ki nongshong shnong ka thaiñ da kaba shakri ïa ka bha ka miat jong ki heh spah. Ka roi ka par kam dei ban ktah pat ïa ki paidbah bad ka mariang. Ka hok na bynta ka jingïakhih ba jai-jai ka dei ka hok longbriew-manbriew. Ka jingbym larkam jong ka Jylla ban ïada ïa ka hok ka pyni ba ka synshar paidbah ka don hapdeng ka jingma,” la ong u nongaiktien ka VPP, Dr. Batskhem Myrboh ha ka kyrwoh khubor.

Nalor kane, u la ong ba ki bor distrik bad ka Sorkar Jylla ki dei ban pynshitom da kaba tyngeh ïa kito ki pulit ba donkti ha katei ka jingjia, ‘Manager’ bad ophisar ka kompeni da kaba shim ruh ka jingkitkhlieh ïa ka jingsumar ha ka liang ka dawai-dashin kumjuh ban siew bai lut ksan sha baroh kiba la mynsaw.