Shillong, Nailar 25
I Bah Gilfred Sing Giri, khun jong i (L) Bressimai Khyriemmujat bad (L) Olim Sing Syiem, Syiem ka Hima Khyrim, i la khlad noh ha ka Sngi Thohdieng (25/08/2023) ha ïing sah jong i ha Nongrimbah, Laitumkhrah. Ka jingleit on tep ïa i kan long ha ka 27 tarik Nailar, 2023 ha u Lum jingtep ka Balang Presbyterian Laitumkhrah ha Lawjynriew. Ka jinglehniam ha ïing ha ka sngi tep kan long ha ka por 3:00 baje nohphai sngi.
Katkum u kyrwoh, la kha ïa i Bah Gilfred Sing Giri ha ka 10 tarik Kyllalyngkot, 1933. I la trei kum u nonghikai ha ka skul miet Mawkhar Christian naduh u snem 1954 haduh 1974 ha ka ba la pynkylla ïa ka sha ka skul step.
Kum u nongthoh, i la long u Editor jong ka kotkhubor Khasi “Ka Lympung Ri Lum” kaba la pynmih man ka Sngi Saitjaiñ ha u snem 1956 – 1957.
Ha ka saiñpyrthei, i la long u nongkyrshan ba radbah ïa ka jingïaleh Hill State kane ka jylla. I la long ruh u dkhot jong ka India Tribal Union bad trei ryngkat bad kiwei ki ’riew saiñpyrthei kane ka thaiñ. I la long u dkhot jong ka United Khasi and Jaiñtia Autonomous District Council bad hadien ka Khasi Hills Autonomous District Council naduh ka snem 1958 haduh 1967.
Ka Dorbar jong ka Council ha u bnai Rymphang – Lber 1966, ka la jied ïa i kum u Chairman jong ka Khasi Hills Autonomous District Council bad i la bat ïa kane ka kyrdan haduh u snem 1967.
I la long ruh u Member jong ka Legislative Assembly jong ka Provisional Government jong ka Autonomous State ka Meghalaya ha u snem 1970.
