Shillong, Nailar 25
Ka Hynñiewtrep National Liberation Council (HNLC) ha ka Sngi Thohdieng ka la pynrem jur halor ka jingpyndonkam palat jong ki pulit ïa la ka bor ban bom bad tied ïa ki paidbah ha Thangskai, East Jaiñtia Hills ha ka Sngi Palei kiba la thmu ban pynpaw ïa ka jingpyrshah ha ka ‘Public Hearing’ ba la khot da ka Meghalaya State Pollution Control Board halor ka Meghalaya Cements Limited.
Ha u kyrwoh khubor, u General Secretary & Publicity Secretary ka HNLC, u Bah Saiñkupar Nongtraw, u la ong ba ka seng ka pynrem jur ïa ki pulit ba la ïalam da u Superintendent of Police (SP) uba dei na shabar jong ka jylla.
Ha kajuh ka por, u la ong ba ka jingkhlong ïa ki mar poh khyndew da ki karkhana shna dewbilat bad ‘coke’ ka la pynjulor ïa ki wah bad ïa ka mariang.
“Ka HNLC ka ban jur halor ka jingdonkam ban pynkut noh ïa ki jingïakynad hapdeng ki kynhun jong ka jaitbynriew Hynñiewtrep. Ngi ñiew bad ngi kheiñ ïalade kum ki dkhot jong ka Ri kaba shah ñion ha kaba ka sorkar ka pyndonkam da ka buit ban pharia ïa ka jaitbynriew, bad ïa ka sorkar la pynïaid da ki briew ki bym dei na ka jaitbynriew Hynñiewtrep,” la ong u Bah Saiñkupar.
Shuh shuh utei u heh ka HNLC u la ong ba u nongshun u dei uba bun buit bad namarkata, ka donkam ïa ki dkhot ka jaitbynriew Hynñiewtrep ban sangeh noh ïa ka jingïashrut para ma ki bad ban pynjot pynpra iwei ïa iwei pat. Ha kajuh ka por, u la ong ba ki pulit kiba dei na ka jaitbynriew Hynñiewtrep ki dei ban ïada ïa la ki jong ki paidbah ha ka jaka ban shoh ban dat ïa ki tang ban pynsngewbha ïa ki heh jong ki bad ïa ki heh saipan kiba dei na shabar ka jylla.
