Nongstoiñ, Nailar 24
U Bah Ardent M. Basaïawmoit, MLA ka Nongkrem bad President ka Voice of the People Party (VPP) u la ong ba kum ki paidbah lada kim sngewthuh sa ha kane ka kynti kaba mynta, kan sa poi ka por ba lada ka jingkylla ka synshar ka khadar kan ym wan, kata ym dei tang u lathi ba kin shah tied hynrei kin sa shah pynkbum ruh da u kuli.
U Bah Basaïawmoit u la kren ïa kane ha ka jingïalang jong ka VPP ha Langpih ha ka Sngi Thohdieng hadien ba u la pynpaw halor ka jingjia ha ka 24 tarik u Nailar 2023 ha ka jingpynsngew paidbah ha East Jaiñtia Hills ban twad jingmut na u paidbah, la u paidbah u dang kwah ne em ban ai jingbit ïa kata karkhana pynmih dewbilat ba kan nang pynïar ïalade.
U la ong ruh ba lyngba ki lad pathai khubor la sakhi ba la bom la tied ïa kita kiba pyrshah bad kiba phah bom dei da ki trai jong ki karkhana pynmih dewbilat.
Ha kajuh ka por, u la buh jingkylli ba hato ïa ka Meghalaya la pynïaid da ki trai karkhana pynmih dewbilat na Ri-lum Jaiñtia kat haduh bym sngew eiei shuh ban bom ban tied ïa ki longkmie ïa ki khyllung-khynnah.
Shuh shuh u la bynrap, “Phi jied ïa ki heh spah ha ka por ilekshon, phi jied ïa kiba ai bai kyiad ha ka por ilekshon, ka la dei ka por ïa ki ba kin pynheh spah.”
“Ko ki paidbah kaei kaba phi lah ban leh, kynmaw kato ka por kaba phi ïa sngewtynnad ban shong kali ei, ban ïoh kyiad ei, kato ka por kaba phi leit bam ja ei, ka dei ka por kaba kongsan tam kaba phi hap ban pyrkhat uba kumno u nongïalam ngan ïoh,” u la ong.
Kumta kum ki paidbah lada kim sngewthuh sa ha kane ka kynti kaba mynta kan sa poi ka por ba lada ka jingkylla ka shynshar ka khadar kan ym wan ba ym dei tang u lathi ba ki paidbah kin shah tied, hynrei kin sa shah pynkbum ruh da u kuli, la ong utei u nongïalam ka VPP.
