Ngi la sei ïa ki nongïalam mynshuwa kiba sngewtynnad ban pynpait pynpra: Ardent

Ha kane ka sngi la sakhi da ki spah ngut ki paidbah jong ka thaiñ Langpih kiba la wan shakhmat ban pynïasoh sha ka seng VPP.

Nongstoiñ, Nailar 25

U nongïalam ba rangbah ka Voice of the People Party (VPP), Bah Ardent M. Basaïawmoit ha ryngkat ka jingdonlang u Bah Adelbert Nongrum, MLA ka North-Shillong ha ka Sngi Thohdieng u la hiar sha Langpih ban pynshai ïa ki nongrim kumjuh ban pynrung dkhot ïa ki paidbah sha ka seng.

Ha kane ka sngi, la synran lang da ki nongkitkam ba hakhmat ka VPP, ki ’riewrangbah bad kiwei-kiwei, ïa kaba la pynlong ïa ka jingïalang ha phyllaw jong ka skul Raid Mynsaw UP School, Langpih.

Ha kane ka sngi la sakhi da ki spah ngut ki paidbah jong ka thaiñ Langpih kiba la wan shakhmat ban pynïasoh sha ka seng VPP.

U MLA ka seng na North-Shillong konstitwensi, Bah Adelbert Nongrum u la ong ba ka jingmih jong ka VPP ka dei namarba kiwei ki seng ki la ïalam bakla bad ki la thok la shukor bad pynbiej ïa u paidbah tang shuwa ka ilekshon.

Na ka liang u Bah Basaïawmoit, u la ong ba 51 tylli ki snem ki la dep ban ïaid hynrei dang don hapdeng ki jingsyier, ka jingduk ka jingkyrduh, ka jingbiej, bad ka don ruh ka jingïapait ïapra jong ka jaidbynriew ha ki shnong ki thaw.

“Ngi la sei ïa ki nongïalam ha ki por ba mynshuwa kiba sngewtynnad ban pynpait pynpra ïa ki shnong ki thaw, kiba sngewtynnad ban pynmih kynhun hapdeng jong ka jaidbynriew, hynrei ka VPP kam kwah da lei-lei ïa kiba kum kita ki sienjam, hynrei kaei kaba ka kwah ka long ban hikai ïa u paidbah ha ka jingïatylli ha ka jaidbynriew,” u la ong.

U  la ong  ruh ba ka synshar-khadar kaba khuid ka dei ka thong kaba nyngkong eh jong ka VPP, ym tang katta hynrei u la ong ruh ba dei tang ka jingïatylli ka ban long ka atiar kaba lah ban pynkhlaiñ pat ïa ka jaidbynriew.

Haba kren pat ha kaba ïadei bad ka jingjied nongmihkhmat, utei u nongïalam u la ong ba lada haduh mynta ki paidbah ki dang ïa jied da ka jingsngew kan don ka jingma kaba khraw, da kaba ong “ngi sngew ieid palat ïa une lane sngew ieid pat ïa ka seng, lane nga la don katta snem ha kane ka seng ngam lah ieh shuh,” lada ngi dang pyrkhat kumta kam don jingmut ban ïakren ban ïatai ïa kita ki jingeh.

Shuh shuh u la bynrap ba lada kwah ban lait na ki jingeh bad ki jingma kiba ap, kata dei ban klet noh ïa ka jingieid seng bad jingïadei paralok bad ai ïa ka kti kamon ka kti kadiang sha ka VPP bad kyrshan ïa ka seng kaba don ïa ki nongrim kiba skhem halor ka synshar ka khadar kaba khuid bad ka jingthmu ba sngur ban pynim ban pynbha pat kumjuh ban pynkylla dur ïa kane ka ri kaba ieid eh.

U la kyntu ruh ïa ki paidbah ba ki dei ban sangeh ban jied ïa ki nongmihkhmat da ka jingsngew hynrei jied da ka jingpyrkhat.