Shillong, Nailar 25
Ka District Legal Services Authority (DLSA), East Khasi Hills ha ryngkat ka jingïasnohktilang bad ka Meghalaya State Legal Services Authority (MSLSA), Shillong bad BDO, Mawryngkneng Block ka la pynlong ïa ka prokram ai jinghikai halor ki aiñ ki kanun na bynta ka “Beti Bachao Beti Padhao”.
Ïa kane ka prokram la pynlong ha ka Sngi Thohdieng ha Block Headquarter ha ryngkat ka jingïashim bynta jong ki Sordar, Rangbah Shnong, khlieh nongïalam niam, BMC-SSA, Principal, Headmistress, nonghikai, khynnah skul, Anganwadi, Seng Longkmie lem bad ki samla.
Ha kane ka sngi ki la don palat 100 ngut kiba la wan sha ka prokram.
Ka phang halor ka aiñ POCSO la shimti da ka Chief Judicial Magistrate EKH, Kong N. Dkhar katba ïa ka JJ Act da ka Judicial Magistrate First Class, Kong B. Kharbithai.
Na ka liang ka Kong Wansuk Surong, APO ka la ai ïa ka jingkren na ka liang ka ophis BDO.
Ïa katei ka prokram la pynïaid da u Bah Albinus Nongkynrih, Asst. Manager i/c EFC Mawryngkneng Block (Nodal Officer ka BBBP).
