Shillong, Nailar 25
Ka Sorkar Jylla lyngba ka tnat lariti ka la rai ban ai jaka kumba 5000 square feet na ka bynta ban tei ïa ka shlem treikam ka Khasi Authors’ Society (KAS) ha Tribal Research Institute kaba dei ka jaka jong ka tnat lariti (arts and culture) ha Mawlai Nongkwar.
Haba pynbna ïa kane lyngba ki lad pathai khubor ha ka sngi Thohdieng, u Myntri ka tnat lariti, u Bah Paul Lyngdoh u la ong ba kane ka jaka ka dei jong ka tnat lariti ka Sorkar Jylla bad yn ai khnang ïa ka jaka sha ka KAS khnang ba kan ïoh ka shlem treikam kaba biang bad yn nang lah ruh ban pyntyllun ïa ki kam kiba dang ïakhun haduh mynta ban ïoh rung ka ktien Khasi hapoh ka Khyrnit Baphra jong ka Riti Synshar ka ri.
U la ong ba ka bynta banyngkong ka dei ka jingai ïa ka jaka sha ka KAS bad ka ba-ar pat ka dei ka sienjam kumno ban tei ïa ka shlem treikam bad ha kano ka rukom ka Sorkar Jylla ka lah ban ïarap.
Haba kren shaphang ka jingsahteng ban ithuh ïa ka ktien Khasi, u Bah Paul u la ong ba um kwah ban kynthoh ne ong ei ei balei bad na kano ka daw ym pat ïoh jingithuh, hynrei ka ktien Khasi kaba la ïoh rung kum ka sobjek pule wat ha Kolkata University naduh ki snem 1900, ka la dei hok ban ïoh jingithuh noh.
