Shillong Nailar 25
Ka Kynhun Myntri ka la ai jingmynjur ban ïoh sdang noh ïa ka jingpule doktor ha lai tylli ki jaka, ha Shillong, Tura bad Ri Bhoi District.
Ka Myntri Sorkar ka Kong Ampareen Lyngdoh ka la ong na ka bynta ka Shillong Medical College, katba dang ap ban tei ïa ka jaka pule kaba paka, ka tnat ka koit ka khiah kan dang wad lad kumno ban pyndonkam ïa ki jaka sumar kiba la don lypa kum ka Shillong Civil Hospital, Ganesh Das Hospital bad ki nonghikai kiba la don lypa naduh ki Specialist Doctor bad kiwei kiba lah ban long ki nonghikai bad nongtrei. La pynkhreh ban sdang 50 ngut kiba pule doktor ha Shillong.
Haba ïadei bad ka Tura Medical College kaba dang ïaid ka jingtei jingshna bad ka tnat ka koit ka khiah kan sa shim rai haba ïadei bad ka jingtreikam ka Tura Medical College naduh ka jingïoh ïa ki nonghikai lyngba ka PPP lyngba ka jingïateh bad ki jaka pule doktor kiba paw ban pyntreikam ïa ka jaka pule doktor.
Sa kawei pat ka jaka pule doktor ka dei ka skulbah USTM ha Ri Bhoi District, ka Kong Ampareen ka la ong ba ka don ka PA Sangma International Medical College ha Ri Bhoi District kaba dei ka skulbah shimet kaba la tyrwa ban ai jaka ban pule doktor la kumno-kumno 40 ngut bad kyrpad ïa ka Sorkar ban kyrshan lyngba ka ram ïa kane ka skulbah.
Haba kylli naduh lano kine ki jaka pule doktor kin biang lut ban ïoh pule ki samla ka Jylla, ka Kong Ampareen ka la ong ba ha kine ki ar snem la khmih lynti ba yn lah ban biang ki jaka pule.
