Jowai, Nailar 27
U Superintendent of Police ka West Jaiñtia Hills District, Bah Chemphang Syrti ha ka Sngi U Blei u la pynshai halor ka jingphet krad ki pulit ka jylla ha Lapangap kaba la jia ha ka Sngi Saitjaiñ.
U Bah Syrti u la ong kane ka la jia dei hadien ba la pyntip sha ki, ba ki pulit ka Assam ki shna ktem ha ka jaka kaba ki Karbi ki kam ba ka dei ka dang hap hapoh ka Assam katba ki nongshong shnong ka Lapangap ki ong ba ka dei ka jaka kaba dang hap hapoh ka Meghalaya.
U la pynshai ba la mih ki paid na Assam kiba tur sha ki pulit ka Meghalaya bad la dawa ïa ki ba ki dei ban leit phai namar katei ka jaka ka dang hapoh ka Assam.
Hadien kane, kine ki briew na Assam ki la sdang ban kawang maw bad siat da ki jri siat sim ban beh ïa ki pulit.
Namar bym don u pud u sam uba shai nangno la hap sha Meghalaya bad nangno sha Assam, ki pulit ka Meghalaya ki la leit phai khlem ka jingpyni bor khnang ban lait na kano-kano ka jingsngewsih.
Katba ki paid Assam ki neh ha ka jaka ba ki kam ba ka dang hap hapoh ka Assam.
Halor kane ka jingjia la pyntip sha ki pulit ka Assam kiba la wan ban pynjai-jai ïa ki paidbah ka Assam bad ki pulit ka Meghalaya ruh ki la pynjai-jai ïa ki paidbah ka Meghalaya ba kim dei ban leit tur sha ka jaka ba don ka jingïakajia pud.
